Regular Forest Guard batch 17-na te chuan thla 6 chhung an training zovin vawiin khan Forest Training School Hostel kawttual-ah certificate hlanna inkhawm neih a ni a. Environment & Forest Minister Pu H.Rohluna’n Forest Guard training chhuak mi 31 hnenah certificate a hlan a. An zinga mi 8 in honours hmu-in mi 20 in Distinction ah an pass a; mi 3 in First Division ah an pass a ni.

Thu sawiin Pu Rohluna chuan Forest department hnuaia Training school chu tih changtlun chhoh zel tuma hma lak a ni, tiin heta tan hian Japan International Cooperation Agency(JAICA) project hnuaiah department chuan beiseina sang tak a nei tih a tarlang a. Mahni ram chhung ngeiah mahni ram thing leh mau leh nungchate mila Forest Guard ten training an nei thei chu vanneih thlak a tih thu sawiin Pu Rohluna chuan ramngaw leh nungcha humhalh bakah ram leh leilung hausakna te hai chhuak a, ramin a chhawr tangkai theih tura hma la turin training chhuakte chu a chah a. An tan kaisanna kawng a inhawn zau dan tarlangin Pu Rohluna chuan training chhuakte chu tuna an phurna hloh lova, hmun kilkhawr zawkah pawh thahnem ngai taka ram tan thawk turin a chah a. Zu leh ruihhlo laka fihlim tura hrilhin transfer leh posting chungchang ah tumah ruai lo turin a hrilh lawk bawk. Mipui tawiawmna tel lova department hmalakna a hlawhtlin theih loh thu sawiin Pu Rohluna chuan training chhuakte chu an thawhna hmun apianga khawtlang hruaitute tawiawmna la thiam turin a chah bawk a ni.

Certificate hlanna inkhawm hi Pu Rosiama Vanchhawg, CCF(Admn) in a kaihruai a. Pu K.Kar, Principal, FTS chuan report pein Pu Liandawla, CCF leh Pu Suanzalang, CF ten fuihna thu an sawi bawk a ni.

Forest Training School hi kum 1974 a din kha niin heta tang hian Forester, Forest Guard, Surveyor leh Dy.Ranger te pawh training pek an ni thin a. Kum 2011 thlenga Forest Guard training chhuak tawh zat hi mi 556 niin Forester 257 an train chhuak tawh bawk a ni. He School hi Aizawl Bethlehem Vengthlang ah awmin a compound chhungah hian trainee te tana zir tham thing chi hrang 152, nauban chi 50, mau leh hnang chi hrang hrang a awm a ni.