Vawiin khan Industries Minister Pu S. Hiato chuan Durtlang a Special Blind School Computer Training Centre leh Peace Home, Durtlang-a Bosco Academy of Skills and Employment (BASE) Training Centre thar a hawng a. Minister hi Tourism Director Pu Vabeiha Hlychho leh Industries Department aiawhin Pu Lalzabiaka, Dy. Director leh Lalhmachhuana, Functional Manager ten an tawiawm a ni.

September ni 1, 2001 atanga Samaritan Association for the Blind (SAB) hnuaia din Special Blind School, Durtlang chu Ministry of IT-in rampuma special school 100 tanpui tura a thlante zingah telin mitdelte tana a bik taka siam computer an zir theihna tur Computer Training Centre hawn sak an ni a. He Computer Centre hi vawiin khan Minister Pu S.Hiato-in hawngin tanpuina Rs. 10,000/- a hlan bawk a ni. Sorkarin rualbanlote a ngaih pawimawh avangin hun lo kal zel turah pawh hmalakna hrang hrang a neih sak dawn a, sorkar hna ah pawh an tan reservation a awm chho zel tur thu a hrilh a ni. Kumin Krismas hma ngeia Aizawl Phase-II peih ngei a nih a beisei thu leh tui connection pawh pek an nih tur thu a hrilh bawk a. Tourism Department-in Hmuifanga Tourist Complex an tlawh theihna turin ruahmanna a siamsak dawn a ni, a ti bawk.

Fernando Integrated Women Development Centre (FIWDC), “Peace Home” tia hriat lar, Durtlang ami chu Minister hian tlawh nghalin he hmuna Don Bosco Tech-in Ministry of Rural Development hnuaia hmun kilkhawr zawka awm thalaite hmasawnna atana a ruahmanna chi khat Bosco Academy of Skills and Employment (BASE) Centre a din thar chu a hawng nghal a ni. He scheme hi Ministry of Rural Development chuan Delhi-ah hmunpui nei Don Bosco Tech kuta a dah thu leh kum 2011-2012 inkarah rampuma thalai harsa zawk 9400 lai training pek a, eizawnna ngelnghet siam sak tum a nih thu Father Johnson, Executive Director, Bosco Reachout chuan a sawi a; Mizoram hmun dangah pawh he scheme hi kalpui zel a beisei thu a sawi bawk.

Khuallian Pu S. Hiato chuan FIWDC leh DBTech tangkawpa an hmalakna chu ropui leh fakawm a tih thu a sawi a. Mizoramin Pathian malsawmna tam tak kan dawng a; sorkar, kohhran, tlawmngai pawl leh mipuite kan tanrual thiama, rilru hmunkhat kan put phawt chuan khawvelin kan eng a hmu ngei dawn a ni, a ti. DBTech chuan Mizoram chhimlamah pawh he scheme hi kalpui ngei turin a sawm a, FIWDC tanpui nan Rs.10,000/- a hlan nghal bawk a ni.