February ni 19, 2013 zing dar 4:00 leh dar 5:00 inkar vela Chikha Khua, Mamit District atanga Forest hnathawk mi 5 rukbote chu nimin khan chhuah niin vawiin khan Aizawl an lo thleng a ni. Heng rukbo chhuah tak te hmuahna leh lawmna inkhawm vawiin Company Peng, Hunthara hmanah Home Minister Pu R. Lalzirliana, Dy. Speaker Pu John Rotluangliana, Forest Minister Pu H. Rohluna, Parliamentary Secretary Pu Lal Thanzara, Parliamentary Secretary Pu S.Laldingliana, Law Commission Chairman Pu Lalrinmawia Ralte leh MLA Pu Lalrobiaka te bakah CYMA hruaitute, sorkar officials pawimawh te, Hunthar YMA, Local Council leh tlawmngai pawl hrang hrang aiawhte leh mipui thahnem tak an tel a ni.
Rukbote hmuahna inkhawm CYMA president Pu T. Sangkunga kaihhruaiah Home Minister Pu R.Lalzirliana chuan misual tuten emaw Mizo fate rubo a, sumdawn nana an hman kan phal lova, Mizote hi min zuam tur a ni lo, a ti. Tuna rukbote chhanchhuahnaah pawh hian cheng khat mah sorkarin a seng lova, Pathianin a veng a, anmahni rubotute pawh beidawngin pawisa pawh phut ngam tawh lovin an chhuah a ni, a ti bawk. Rukbote haw theihna tura theihtawp chhuah tu Mizoram Police te chu an fakawm hle a ni tiin Home Minister chuan YMA, rukbote chhungkua te leh mipui mimir ten sorkar hmalakna ngaichanga, ngawi renga dawhthei taka an awm thei chu a fak a ni. Hetiang hun khirh tawh chang pawha dawihzep vang ni lovin huaisenna vang zawka ngawih thiam hi hun lo la kal zel turah pawh Mizo fate inlungrual kan zirna tur a ni nghe nghe, a ti. Good Friday ni takah hetianga rukbote tan tlanna ropui kan hmu hi a inhmeh hle a a hriat thu sawiin Pu R.Lalzirliana chuan mi rukbote chu doctor ten uluk taka medical check-up an tih sak tur thu leh enkawl zui ngai an awm a nih pawhin a senso zawng zawng chu sorkar-in a tum sak vek ang, a ti.
Parliamentary Secretary leh Aizawl North-III bialtu Pu Lal Thanzara pawhin thusawiin ram leh hnam tana bei pawh ni lo, misual tute emawin sumdawn nana kan Mizo unaute an ru bo ringawt hi tun hunah ngaidam mahila, ti leh tawh loh turin kan chah nghal a ni, a ti. Mizoram sorkarin sum peka tlanchhuah a tum loh chhan chu misual ten sumdawn nana min hman a, an zawngchhang kan duh lova; hun lo kal zelah pawh Mizo zawng zawngte chu kan inthurual zel tur a ni, a ti. Rukbote chhungte rilru hah leh hrehawm tawrh zawng zawng chu Pathian hnaihtirtu ni se, rukbo lo haw te pawh hriselna tha tak nen an hmalam hun tha taka an hman chhoh a duhsak thu a hlan a ni.
Rukbo lo hawte lawmna inkhawmah hian CYMA, Hunthar Local Council leh Hunthar Veng Branch YMA aiawhten lawmpuina thu an sawi a. CYMA General Secretary Pu Vanlalruata chuan vawiina thil thleng hian Mizote hi Pathianin hnam anga a din hi hnam anga kan awm zel a duh a ni tih a tilang a ni, a ti a. Mizoten hetiang harsatna kan tawh chhung hrehawm hle mahse Mizo thalai leh thangthar ten hnam leh ram veina thinlung an phut phah chu a lawmawm hle a ni, a ti bawk.
National Liberation Front of Tripura (NLFT) ten an rukbo Forest hnathawk mi 5 vawiina lo haw te chu :
1. Nelson Vanlalruatkima (28), s/o K. Thanzama (L) Hunthar Veng, Aizawl, JCB Operator
2. Lalrinmawia (22) s/o K. Thanzama (L) Hunthar Veng, Aizawl
3. Lalliansanga (42) s/o Zomuana (L) Tahan, Myanmar, P/A Teirei Forest.
4. Lalsangmawia (37) s/o Vanlalsanga West Phaileng Bethlehem Veng.
5. Vanlalfaka (30) s/o Kimthanga Damparengpui Zodin Veng (Ex-BLFM) te an ni.
