Vawiin chawhma dar 11:00 khan MJA Serchhip District chuan Information & Public Relations Conference Hall, Serchhip-ah Annual Conference vawi 6-na an hmang a, Pu FJ. Liantluanga, Project Director, DRDA Serchhip District leh Pu Robert C. Lalhmangaiha, ASO & Nodal Officer, NLUP Serchhip District ten Khuallian leh Khual Zahawm niin an hmanpui a, MJA General Hqrs. Aizawl atangin President, Pu C. Lalrambuatsaiha, Vice President Pu Vanlalrema Vantawl leh Pu Robert Lalchhuana, Prominent Journalist te bakah hruaitu dang ten an hmanpui a ni.

He Conference-ah hian Khuallian, Pu FJ. Liantluanga chuan thu sawiin Chanchinbu mite chu mipuite duhdan, duhzawng leh nunphung te thlenga siamthatsak theitu an ni a, mipui leh khawtlang ngaihhlut leh ngaihsan zawng te siamdiksak theitu an ni a, khawtlang hmasawnna atana an pawimawhna hi a sang hle a ni, a ti. Pu Tluangtea chuan Chanchinbu enkawlnaah mi puitling leh thil hrechinte chuan Editorial an ngaih pawimawh thin thu sawiin, ram leh khawtlang hmasawnna atana thil pawimawh te chu mipuite leh sorkar thuneitute tana tangkai thei turin an ziahchhuah thin a tul thu a sawi a, chanchinbu a thuchhuak a hoh chuan a chhiartu mipuite nun leh hawiher a hniam a, chanchinbu enkawltute thlenga ngaih hniam a awl thin tiin, chanchinbu mite chu thuchhuah tur te uluk turin a chah bawk a ni.

He Conference ah hian Serchhip District MJA te chuan Official Resolution pahnih an pass a, chung te chu :

1) Mizoram sorkar-in Advertisement rate min tihsansak hi lawmawm kan ti a, hetih rual hian Serchhip District-a sorkar Department hrang hrang atanga Advertisement-a tihchhuah awm tak, news item-a tihchhuah sak tura Print leh Electronic Media te hnena ngenna a awm thin hi awm tawhlo se kan ti.

2) Kum 2012 MJA Serchhip District Annual Conference-in Serchhip khawpui chhung National Highway-54 kawngpui chhia siamthat thuai a nih theih nana hma la tura sorkar-a thu kan thlen tawh chu tunah hian hlawhtlingin siamthat mek a ni a. Hemi kawnga bialtu MLA leh Chief Minister, PWD changtu ni bawk Pu Lal Thanhawla hmalaknaah MJA Serchhip District te kan lawm tak meuh meuh a ni.

He Annual Conference hi hun thumah then niin a hun khatna chu Pu Lalremruata Ralte, Vice President, MJA (SD) in a kaihruai a, a hun hnihnaah President, Pu Kapliana Pachuau kaihhruaina in rorelna neih a ni a, chumi hnuah P&E Rest House, Bukpui-ah chawhlui kilho a ni.

He Conference-ah hian Khual zahawm, Pu Robert C. Lalhmangaiha bakah MJA Gen. Hqrs. President, Pu C. Lalrambuatsaiha, Vice President Pu Vanlalrema Vantawl leh Pu Robert Lalchhuana, Prominent Journalist ten thu tha tak tak an sawi a ni.

MJA Serchhip District-ah hian Member 15 an awm mek a, Vawiin a Conference an neihah hian member te an tel kim vek a ni.