Nimin chawhnu khan Environment & Forests Department enkawltu Minister Pu H. Rohluna chuan 13^th Finance Commission sum hmuh atanga cheng nuai 15 senga sak Chhingchhip Forest Rest House chu a hawng. Rest house hawnna inkhawm-ah hian bialtu MLA leh Mizoram KVI Board Chairman ni bawk Pu K. Lianzuala pawh a tel a, hawnna inkhawm hi Thenzawl Forest Division-a DFO Pu C. Lalbiaka’n a kaihruai a ni.

Forest Minister Pu H. Rohluna chuan sum hi a tam ai mah in hman zai thiam a pawimawh a ni, tiin cheng nuai 15 senga heti khawpa Forest Rest House tha sak a ni thei hi a enkawltu leh satu te inpekna a tih a chian hle bakah Environment & Forests Department hian hna lamah quality tha an duh thin chu a ti chiang  a ni, a ti bawk. Minister hian ram dang – Germany leh Japan atang tein Department tih changtlun nan leh Department hmalakna atan project theuhluh anih thusawiin heng project atang hian hmasawnna tam tak a rawn luan luh a beisei thu a sawi.  Green India Mission atangin tlawmngai pawl te nen ram ngaw humhalh leh thing phunna kawnga nasa zawka thawhho leh hmalak mek tum anih thu a sawi.

Food Security Bill tuna Food Security Ordinance ni ta chungchang sawiin Supply Minister Pu H. Rohluna chuan Sawrkar buhfai sem Public Distribution System kalpui mekah hian Mizorama cheng khua leh tui dik takte a huam vekin, man tlawmin buhfai an lei thei nan Sawkarin kumtin vaibelchhe za chuang a seng thin a ni, a ti. India ram state dangah te chuan a state mipui a zawng a za hi PDS in a huam lo a, chuvangin  Food Security dawng tur thlan leh pek chungchangah harsatna an tawk ve lo nia a hriat thu a sawi a.  Mizoramah chuan Food Security hian thingtlanga mihring za a 78 zel  leh khawpuia cheng za a 48 te a huam dawn a, a huam tel ve loh te tan Food Security chu engtia kalpui tur nge tia Central lam dawr a hma lak mek a ni a.  He thil hi hmanhmawh taka thil tih chi anih loh avangin ram leh mipui tana a tha thei ang ber ngaituah a kalpui tum a ni, a ti.  Hemi atana Sawrkar an inpuahchhah mek thu leh Department pawhin chak taka hma a lak mek thu a sawi bawk.

He hun hmanpuitu bialtu MLA Pu K. Lianzuala chuan Sawrkar thil reng reng khua a awmte chu khawtlang ro a ni tiin khawtlang hmasawnna atana Sawrkarin a dah a ni a, a humhalh leh enkawlna lamah khawtlang chuan mawhphurna an nei a, chu chu duat taka enkawl a ni a ti. Chhingchhip chu Mizorama zirna lamah khaw hmingthang a ni tiin ram tana mi pawimawh tam tak an chherchhuah tawh thu a sawi a. Chhingchhip leh a chheh vela khaw danga te ah hmasawnna hna tam tak luang lutin hmuh tur tam tak a awm tawh a ni a ti bawk.

Forest Rest House hi concrete-a sak niin a chhung chu rangva tha chi a chih a ni a. VIP Room pakhat leh room pakhat dang bakah sitting room leh choka a awm a, sitting room ah hian floor tile phah a ni