Nimin khan Chhingchhip Community Hall, Venghlun-ah Rajiv Gandhi Grameen LPG Vitrak hnuaia Chhingchhip leh a chheh vel chawmtu gas agent thar S. K. Indane Gramin Vitrak hawn a ni a. He hun hi Food Civil Supplies & Consumer Affairs leh Environment & Forests Minister Pu H. Rohluna leh bialtu MLA leh Mizoram KVI Board Chairman ni bawk Pu K. Lianzuala ten an hmanpui a, Pu K. Lalpekliana, Manager, LPG Sales, Mizoram, IOC pawh he hunah hian a tel bawk a ni.
Supply Minister Pu H. Rohluna chuan mipui mamawh phuhruk hi Sawrkar tum ber a ni a, eirawngbawlna gas mamawh phuhruk lamah pawh chak tak hma la in thingtlang miten awlsam zawka gas an lak theihna atan Sawrkar Laipuiin a duan Rajiv Gandhi Grameen LPG Vitrak (RGGLV) Scheme chu Mizorama gas agent la awm lohna khaw 28 a dah tuma ruahman a ni a, chung zingah 11 te chu tihhlawhtlin a ni tawh a ni, a ti. IOC lamin hemi atan a tul zawng zawng chak taka an umzui avangin an chhunga lawmthu a sawi. Mualkhang Gas Bottling Plant tih zauh tumna kawnga ram an lak tur chungchangah harsatna a awm avangin Thenzawl ah Gas Bottling Plant thar dah a nih theih nan IOC lam te dawr mek anih thu a sawi bawk.
Pu H. Rohluna chuan eirawngbawlna gas hman hi ram ngaw venna atan pawh hmanraw tangkai tak anih thusawiin tunlai thangthar ten ram ngaw leh nungcha humhalh nachang an hria chu lawmawm a tih thu a sawi. NLUP chungchang sawiin Minister chuan NLUP hi mirethei berte leh mi harsa berte thleng phak tura duan leh siam a ni a, chu chu tih hlawhtlinin a awm mek a, NLUP hian mi hausa leh mirethei inkar zau chu a ti zim thei a ni, a ti.
Bialtu MLA Pu K. Lianzuala’n gas agency hi a hawng a, chumi hnua a thusawiah Hmarchhak state thekhata RGGLV tlem te chiah hawn a nih laia hun reilo tea Mizorama RGGLV agent khaw 11 laia hawn a ni hi thil chhuanawm tak leh chinchhiah tlak a ni, a ti. Sainik School atana Chhingchhipa chhungkaw 40 in an huan lo ram, zangnadawmna beisei miah lova, a thlawnna an pek hi a ropui takzeta, an inpekna hi a chhuanawmin a entawntlak hle a ni a ti. Sawrkar chuan hmasawnna rualkhai tak a duh a, tiin a bial chhunga tunhnaia Sawrkar hmalak tawhna, hmalak mekte leh hmalak zel tumna hrang hrang a sawi tel bawk a ni.
RGGLV hi thingtlang miten awlsam zawka eirawngbawlna gas an lak ve theih nan Sawrkar Laipuiin a duan a ni a. RGGLV hi Mizoram pumah 28 dah tum a ni a, chung zingah 11 te chu hawn a ni tawh a, engemaw zat chu hun reilo tea hawn beisei a ni bawk. S. K. Indane Gramin Vitrak hian Chhingchhip leh a chhehvel khaw dang 8 a chawm dawn a ni.
