Chief Minister chuan vawiin khan Aijal Clubah Cricket Association of Mizoram (CAM) General Body Meeting, CAM President anih angin a hmanpui.

Chief Minister Pu Lal Thanhawla, CAM President ni bawk chuan India a Cricket hotu sang ber Board of Cricket Control of India (BCCI) chuan Mizoramah cricket inkhel thiam aimahin a game chawilar an ngaihpawimawh zawk thu a sawi a. CAM chu BCCI hriatpui leh affiliated member anih theihna tura an hotu mi pawimawh hrang hrangte a dawr thin thu Pu Hawla a sawi a. BCCI chuan CAM chu Associate Member atana a rawn pawm tawh thuah, officiala pawmpuina lehkha an la dawnglo chu tlem lai deuha BCCI-ah harsatna a awm vang anih a rin thu leh kan nghahhlelh avanga rei ta viau ah a lang mai nia a rin thu a sawi a ni. Chief Minister chuan CAM hruaitute thahnemngaihnaah lawmthu sawiin, Mizoramah cricket game hi kan tih lar chhoh deuh deuh a pawimawh hle a ni a ti.

CAM ah hian member nghet club 15 awmin, associate member club 17 an awm bawk a. Sihhmuia Suaka Memorial Cricket Stadium sak mek hi DONER Ministry in Rs.11.20 Crore a pek atanga hnathawh mek a ni a, kumin 2013 November thla a hawn theih beisei a ni.

CAM sum dunhmun report ah April 2012 - March 2013 thleng khan sum hmuh zawng zawng chu Rs.11,63,386/- a ni a, hmanral zawng zawng chu Rs.10,89,019/- a ni bawk a, tuna sum la awm chu Rs.74,367 /- a ni.

Vawiin meeting hmasa zawk hi Pu K.Lalbiakthanga, Vice President, CAM in a kaihruai a. Session hnihna chu Pu Lalrochuanga Pachuau, Working President, CAM in a kaihruai ve thung a. Club hrang hrang atanga agenda thehluh hlawm lian zual pakua te sawiho a ni.