34/2022-2023

Kolasib dated 4th April 2022: Vawiin khan Pu T.J.Lalnuntluanga, Minister of State, Environment, Forest & Climate Change Department chuan Kolasib district chhunga Green India Mission, Nagar Van Scheme leh Compensatory Afforestation Fund Management and Planning Authority (CAMPA) hnuai a hmalakna hrang hrang kalpui dan tur a hmun ah a endik a. Pu Lalrinsanga Ralte, MLA, Serlui Assembly Constituency, Pu Jitendra Kumar, IFS, Principal Secretary & PCCF, Pi Margaret Lalramchhani, IFS, DFO, Kolasib leh EF&CC Department a thawktuten an țawiawm a ni.

Minister Pu T.J.Lalnuntluanga chuan Serlui tuikhuah chhehvel a ram ngaw tih chereu zel a ni chu humhalh vat a țul thu sawiin a kam ațanga lei tawlh avangin Serlui Hydel Project chu hman tlak loh a a awm mai a hlauhthawnawm thu a sawi. Neitu nihna thinglungpu chunga Serlui tuikhuah kam ram ngaw chereu mek ven hna chu Sawrkar emaw, Department bil tih tur a dah mai loa, mitin mawhphurna a nih thu Minister chuan sawiin tuihna humhalh leh lei țham bettu, thing phun uar zel turin mipuite a ngen bawk a ni. Chhuan lo la awm zel turte tan a ram nuam, hrisel leh thianghlim hnutchhiah a nih theih nan tun a hmalakna hi a pawimawh thu Minister chuan sawiin ram ngaw, nungcha leh leilung hausakna hrang hrang humhalh kawng a țhanharh a țul thu a sawi bawk a ni.

Pu T.J.Lalnuntluanga chuan Green India Mission, Nagar Van Scheme leh Compensatory Afforestation Fund Management and Planning Authority (CAMPA) hnuai a hmalakna tur Kawnpui, Bilkhawthlir Joint YMA park, Serlui tuikhuah leh Aitlang luite a tlawh a. Saiphai leh Vairengte inkar a dan loa thing leh mau tawlhruk a awm loh nan Check gate ruahman dan turte, Aitlang lui, Vairengte kam humhalh tur a hmalak dan turte Forest Department thawktute nen an en ho a, Botanical Garden sakna tur hmunhma an endik a. DFO Kolasib hmalaknain dan phal loh a ramsa kah man hal ralna hun EF& CC Minister chuan a hmang nghal bawk a ni.