Mizoram Environment & Forest Department-in Central Nursery Sairang-a cheng nuai 15 senga an siam Nauban In (Orchid House) leh Rs.6.80 lakhs senga siam ramhmul damdawi thlai huan (Medicinal Garden) chu Environment & Forest Minister Pu Rohluna’n vawiin chawhnu dar 3:00p.m. khan a hawng.

Minister chuan thu sawiin Mizoram Nauban te leh Ramhmul damdawite a ruka tawlh chhuah a ni thin chu ngaimawha vawn that nan hetiang hmun buatsaih a nih dan te a sawifiah a. Department officer leh staff te chungah lawmthu a sawi. Tunah a hlutzia la hre vek lo mah ila zirlai leh thangtharten an la rawn chhawr tangkai ngei a beisei thu a tarlang bawk. Nauban leh Ramhmul damdawi te chu Zoram tan rohlu a ni tiin a humhalh kawngah pawh mitin kan tan tlan a tul takzet thu te a sawi bawk.

Minister hian Environment & Forest Department buatsaih Orchids of Mizoram tih lehkhabu a tlangzarh nghal a, Principal Secretary & PCCF Dr S.S.Garbyal, IFS chuan thlai leh thinga Mizoram hausakna vawng nung zel tura hetiang hmun buatsaih a nih dan te a sawifiah a, la siam changtlun zel tur a nih thu te a sawi tel bawk.

Orchid House hi 40ft x 30ft –in chhawng a ni a, Mizoram hmun hrang hranga nauban chi hrang hrangte lakhawmin hetah hian enkawl tum a ni a. Environment & Forest Department-in Mizoramah nauban chi 87 an hmuhchhuah tawh zingah tunah hian nauban chi 54 dah a ni. Medicinal Garden hi 4hectre a zau a ni a, Mizoramah ramhmul damdawi chi 400 hriatchin zingah tunah hian chi 23 chin a ni a, chi dang te pawh la dah belh a, la tihchangtlun zel tum a ni.

Orchid House & Medicinal Garden hawnna inkhawm hi Pu Lalthangliana Murray, IFS, Conservator of Forest, Central Circle-in a kaihruai a, Pu V.Lalfala, IFS, DFO Aizawl Forest Division-in report a pe bawk. Forest Department hotute leh official dangte an kal tha hle a ni.