1010/2026-2027
Dated Khawzawl, the 15th June, 2026 : Vawiin khan Khawhai Town Hall-ah Young Mizo Association Khawhai Branch chuan YMA Day vawi 91-na an hmang a, Environment, Forest & Climate Change (EF&CC) Minister Pu Lalthansanga chuan khuallian niin a hmanpui.
Pu Lalthansanga chuan, 'Kan ram hian ramdang neih ve loh tlawmngaihna kan nei hi kan vannei hle a, he nun ze mawi tak hi chhawm nung zel turin kan inchah duh a ni. Zin miten kan ram an rawn hre pawh zel a, kan ram sik leh sa leh thing leh mau ringawt te hi hmuhnawm an ti a ni. Kan pipute sulhnu tun thlenga kan la hmuh theihte hi humhalh kawngah tan kan lak a ngai a, thang thar lo awm zel turte tana a pawimawhna kan inzirtir uar zel ka duh a ni’ a ti a. ‘Zirna kawngah hma kan sawn rualin tun aia nasa zawka zirna lamah kan tan zual a ngai hle a ni. Saptawng mai bakah Hindi hi kan zir thiam a pawimawh em em a ni. Hindi hi kan thiam loh chuan kan hun kal zel turah harsatna kan tawk thei a ni. Kan thalaite nun hi kan ven uluk a ngai tawh hle mai a, ruihhlo in nasa takin kan thalaite a run mek a, chhungkua, khawtlang leh ram nasa takin a nghawng avangin he thil hi theihtawpin kan do rual a ngai a ni,’ a ti bawk.
Forest Minister chuan,’YMA hi mi zawng zawng ta a ni a, sawrkar pawh hian ram tana hmasawnna hna a thawh kawngah hian YMA leh NGO pawl hrang hrang te nen inlungrual takin hna a thawk thin a ni. Kan ramah hian pawl hrang hrang, Kohhran hrang hrang leh party pawh chi hrang hrang kan awm a, heng zawng zawng hi hmun khata min phuarkhawmtu chu YMA hi a ni,’ a ti a. ‘Kan ramin hmasawnna hmel thar a hmu zel a, hnathawh tha lo kan hriat chuan sawrkar hotute hnenah hrilh vat turin kan inngen a ni. Sawrkar hna lak kawngah pawh fair taka tlingte chu lak mai an ni a, a hmaa insawipui ang khan awmzia a nei tawh loh avangin thalai hna zawng mekte tan kawl a eng chho zel a ni. Chief Minister taima tak kan nei a, kuthnathawktute tan a theihtawp a chhuah tak meuh meuh a ni. Naupan lai atanga thingtlang lo neia hnathawk a ni a, kan ramin State dangte ruala hma a sawn ve thei h nan rim takin hna a thawk a, a lawmawm em em a ni’ a ti bawk.
He hun hi Pu Thanhnuna, President chuan a kaihruai a, Tv RK Lalramdinpuia, Sec III in hunserh hmangin Pu K Lalrammuana, Secretary chuan report a pe bawk. Hun hi chawhma, chawhnu leh zanah te hman a ni a, section hrang hrang ten item chi hrang hrangin inelna an neih bakah intihhlimna hun an hmang bawk.
