1009/2026-2027
Dated Khawzawl, the 15th June 2026 : Vawiin chawhnu khan Information, Public Relations, Printing & Stationery (IPRP&S) Minister Pu B. lalchhanzova'n YMA Sialhawk North Branch YMA Day vawi 91-na chu Sialhawk YMA Hall-ah khuallian niin a hmanpui.
YMA Day lawmnaah hian khuallian Pu B. Lalchhanzova chuan Sialhawk North Branch YMA tan cheng singkhat hlanin thu sawina hun a hmang nghal a. Mizo hnam lo kal tawhna hriatreng nan leh a kal leh zelna tur atan YMA Day lawm thin a ni hi a hlu hle a ni a ti a. Sialhawk khua chu kuthnathawk nasa khua an nih thu sawiin an branch chhunga ruihhlo zuar an awm lo chu lawmawm a tih thu a sawi a. Mi tupawh kuthnathawka eizawng emaw zirlai emaw eng mi pawh ni ila khawvelah eng hna mah hi a sang bik leh a hniam bik a awm lo a, kan hma theuha tih tur awm hi tha takin ti ila, dikna leh rinawmna in kan nun kaihruai sela, kan theihna zawn theuha midangte tan malsawmna kan nih a pawimawh a ni, a ti a. Mizote chu kan nihna zahpui lo a, kan nunphung, kan hnam zia, kan hnathawh te chawimawia, kan nihna ang anga kan lan ngam a pawimawh thu sawiin, hmalan pan tura bei zel chungin, kan thlen chin zelah nun hlim leh hahchawl neih a pawimawh thu a sawi a.
Khuallian chuan zirlaite tan fuihna thu sawiin, Mizote hi kan thluak a tha a, kan ram leh kan khuate hmasawnna kawnga thui tak kan thlen theih nan zirna lamah tan kan lak a ngaih thu a sawi a. A bial chhungah zirlai 117 tlawhchhuah program siamin, lehkha zir thei chu an hun tam zawk lehkha zir nan an hman a ngai tiin a fuih thin thu a sawi a. Sialhawk khaw hruaitute pawh an khawchhunga zirlaite chutianga fuih zel turin a chah a.
He YMA Day lawmna inkhawm hi Branch YMA President Pu Lalngaihawma Khiangte chuan a kaihruai a, Branch YMA Secretary hnen atangin report ngaihthlak a ni a. Sialhawk North Branch member hi 570 vel an ni a, nikum leh kumin YMA Day inkarah YMA member boral an awm lo a, an branch huamchhungah ruihhlo zuar an awm loh thu te ngaihthlak a ni. YMA thuthlung sawi rualna neih a ni a, Lalsuamtluanga'n kumpuan thupui sawina neiin, ‘Ziontlang leh van arsi mawi’ tih hla hmanga section inelna neih a ni bawk. Kumin YMA Day thupui atan ‘Ruihhlo do’ tih hman a ni.
