Vawiin khan Forests, Environment & Climate Change Minister Pu T.J. Lalnuntluanga hovin kumina kangmei venna hapta hman dan relin, ama Chairman-na Committee, Sub-Committee on Fire Prevention chu a office ah an thukhawm a ni.

Meeting kaihruaitu Forest Minister Pu T.J. Lalnuntluanga chuan kangmei hi tute pawh in kan tawrh thei reng a ni a, chuvangin kangmei pawizia leh a venna kawnga mitin kan zawn theuhah tih theih kan nei vek a, hemi chungchanga inhrilhriatna leh inzitirna (awareness) hi huam zau zawka kalpui a tul a ni, a ti a. Kum dang aia huam zau zawka he programme hi kuminah hman a duh thu sawiin, Sub-Committee on Fire Prevention Member te chu hemi chungchanga rawtna tha siam a an Department theuh ten hmalakna an neih theih dan te sawi turin a sawm a ni.

Meeting-ah hian He Sub Committee-a Member Secretary Pu Lalrinmawia, CCF chuan Fire Prevention Week tobul leh kum danga an hman dan tlangpui te sawiin awareness chu fund an neih dan azirin huam zau zawk taka tih an tum thu a sawi. Member kalkhawmte chuan Sikul naupangte leh sawrkar hnathawk te pawhin he hapta pawimawhzia an hriat nan Thu Chham (Pledge) tur buatsaih a, chumi chu a huhova zirna inah leh mahni hnathawhna hmun theuhah chham nise an ti. Kawng hrang hrang a awareness neih theih dante chipchiar takin an sawi bawk a. Kangmei Venna Hapta, Fire Prevention Week chu February ni 11-16 ah hman nise, a hawnna programme chu Chief Minister, State Level Committee on Fire Prevention Chairman hova hman nise tia ruahman a ni. Kum danga lo tih thin angin, March ni 15 aia tlai lovah lo/leipui te chu hal hman vek nise tih rawt a ni bawk. Kangmei veng tha district leh khua te tana lawmman siam thin pawh chhunzawm nise tiin meeting chuan a rel bawk a. A endik hna thawk turin tlawmngai pawl NGO hrang hrang ruat dan tur chu NGO-te leh Department hovin ruahmanna siam nise an ti. Kum engemawzat kalta atanga khan CYMA, ASEP, SENVA, MUP, AMFU, NSS leh GNM te ruat thin an lo ni tawh a ni.

Vawiin meeting ah hian Forests, Environment & Climate Change Department a, PCCF pahnih te leh senior officer engemaw zat bakah Department hrang hrang aiawhte leh CYMA, MUP, ASEP, SENVA, AMFU leh STAM aiawhte an tel bawk a ni.