Vawiin chawhnu khan Secretariat Conference Hall-ah Health Minister Dr. R. Lalthangliana hovin 18^th Mizoram State Health Care Society (MSHCS) Governing Body ten thutkhawmna an nei.

Meeting-ah hian Mizoram State Health Care Scheme khawpui leh thingtlang lama huapzo zawka kalpui dan tur te, Mizoram State Health Care Scheme tana sum tam zawk dah te, Scheme hnuaia hnathawk ten 7^th pay an dawn theihna tur te an rel a. Scheme changtlung zawka kenkawh dan tur te, damlo zin veivahna tur senso te, sawrkar hospital bakah mimal hospital pawhin an kalpui theih dan tur te sawiho a ni.   

Mizoram State Health Care Scheme hi April 2008 atang khan kalpui tan niin cheng nuai 3 thleng damlo inenkawl nan bill theih thin a ni a. Kum 2018 October thla atang khan MSHCS leh AB-PMJAY (Ayushman Bharat Pradhan Mantri Jan Arogya Yojana) chhunfin niin chhungkaw pakhat tan cheng nuai 5 thleng inenkawlna senso hi bill theih a ni a. AB-PMJAY hi khawsak harsa zawkte tan damloh nikhuaa inenkawlna atana duan a ni a. Sawrkar atanga khawsak harsa zawkte chhawmdawlna scheme a ni.

Meeting-ah hian Health Commissioner & Secretary, Principal Secretary Home/Finance, Finance Secretary, UD&PA Secretary, Principal Director H&FW, LESD&E, MUP leh health department hotute an tel a ni.