2135/2023-2024

Champhai the 3rd October, 2023 - Ramsa dan lova tawlh ruk man te leh ramsa chhanchhuahte enkawlna hmunpui tur 'Satellite Wildlife Rescue Centre of Aizawl Zoo at Champhai' chu Dum Tlang, Tlangsamah vawiin chawhnu khan EF&CC Minister Pu TJ Lalnuntluanga'n a lungphum a phum. Sawrkar Laipui Ministry of Environment, Forest & Climate Change hnuaia Central Zoo Authority sum cheng vaibelchhe 10.91 senga ruahman tur a ni. 

Hemi puala inkhawm tawi, Pu RS Sinha, IFS, Principal Secretary & Principal Chief Conservator of Forests, Mizoram kaihhruaiah EF&CC Minister Pu TJ Lalnuntluanga chuan Satellite Wildlife Rescue Centre tobul sawifiahin, India ram pum huap Forest Minister-te  inhmuhkhawm tumah Dan lova ramsa tawlh ruk man te leh ramsa chhanchhuahte enkawl zui chungchangah Mizoramin harsatna a tawh thin a thlen chu Sawrkar Laipui Forest Minister leh a thawhpuiten lo ngai pawimawh hle in, he project hi bultan chhoh tak anih thu a sawi a. He project atan hian Central Zoo Authority sum cheng vaibelchhe 10.91 ruahman niin instalment hnih a sum lo lut tur a ni a, tun dinhmunah cheng vaibelchhe 5 release fel tawh niin hnathawh pawh bultan chhoh mek nghal anih thu a sawi a. Satellite Wildlife Rescue Centre hi a taka kalpui anih theih hunah chuan ramsa leh nungchate kan humhalh leh enkawl chungchangah hmasawnna tam tak a thlen dawn a ni tiin, kan thangtharte leh thalaite pawhin environment leh nungcha humhalh a pawimawh zia a taka an hmuh a, an inzir chhohna hmanrua pawimawh taka la ni ngei dawn a ni, a ti a. Forest Department field staff indaihlohna avangin hmalaknate duh anga a chak theihloh thin chu Sawrkar Laipuiah thlen niin, nungchate venghim turin Wildlife Protection Squad mi 50 lai lak Central Sawrkar chuan a rawn phal thu leh lak fel tawh an nih thu a sawi bawk a. Hengte bakah hian Champhaiah Nature Learning Centre, Botanical Garden, Mini Zoological Garden leh Nagar Van te din chhoh mek anih thu sawiin, Forest Department thiltumte ti hlawhtling tur leh an tha ti chak turin Champhai District mipuite thawhho puiah a sawm a ni.

Champhai District Bawrhsap Pu James Lalrinchhana pawhin thu sawiin tun hnaiah Champhai District in hmasawnna thar duhawm tak tak - District Horticulture Office, Champhai leh Turmeric Processing Unit, Tlangsam, GNM Nursing School, Hnahlan Police Beat Post, Critical Care Block sak mek, Sapthei Processing plant ruamhan mekte, Conservator of Forests, Eastern Circle Office hawn thar leh hmasawnna dang tam tak kan hmu thei hi kan vannei takzet a ni tiin, Sawrkar hotute leh Department thawktute thawhrimna leh inpekna zar a ni, a ti a. Hmasawnna thar kan neihte anih tur ang ngeia tangkai taka hman an nih theihnan District mipuite tawiawmna leh finchhuahna a ngen a ni.

Vawiin program-ah hian Forest Department thawktute, Champhai District Head of Office-te, Champhai MJA hruaitute, khawtlang hruaitute, YMA, MUP, MHIP, MZP, Champhai Nature Conservancy aiawhte leh zirlai thahnem tak an tel a. Pu NC Saravanan, IFS, Chief Wildlife Warden chuan Technical Report pe in, Pu Lalduhthlana, IFS, DFO Champhai chuan lawmthu sawina hun a hmang a ni.

Satellite Wildlife Rescue Centre hi ram hectare 20 a zau ah ruahman tur a ni a. He Centre-ah hian Ramsa dan lova tawlh ruk man te leh ramsa chhanchhuahte mumal taka enkawl an ni dawn a. Ramsa dah hrannna Quarantine Centre, Water Storage tank, animal reception room, Veterinanry dispensary, post-mortem room, godown+kitchen, Centre Office leh staff quarter-te ruahman tur a ni a. Ramsa chi hrang hrang – Primates, sava, reptiles, herbivores, rodents, carnivores leh amphibians te a hrana dahna tur hmun hrang ruahman sak vek an ni bawk ang.