2134/2023-2024

2023 Khuangchawi thla ni 3: Vawiin khan Government C. Zakhuma Higher Secondary School 23rd Annual Sports kharna hun, St Joseph Parish Hall, Kolasib-a buatsaih chu Food, Civil Supplies & Consumer Affairs Minister Pu K. Lalrinliana chuan Khuallian niin a hmanpui.

Khuallian Pu K. Lalrinliana chuan C. Zakhuma HSS din tirh lai chanchin sawiin, sawrkar sikula hlan kai a ni ta te, building thar neih belh a ni leh kumin aṭanga commerce zirna dah belh a ni ta te chu lawmawm a tih thu leh thawktute inpekna leh sawrkar duhsakna azara tun hun a thleng thei ropui a tih thu te a sawi a. HSS zirlaite chu an rilru leh taksa chak vanglai, infiamna leh kawng hrang hrangah pawh hma an sawn theih hun lai a nih angin rilru fim tak pu-a an hma lam hun sial tura fuihin, khawvel changkanna ruala ke kan pe ve zel laiin hmasawnna leh thil awlsamna chu a ṭha lam zawnga hman thiam a pawimawh, a ti a. Pathian ṭihna nun nei chu an thil tihah an hlawhtling ngei ngei ṭhin tiin, zirna, infiamna leh thil tihna kawng hrang hrangah Pathian rawn chunga ke pen turin zirlaite chu a chah a. Rinawm leh taima taka lehkha zir a, fimkhur taka nun hmang tur te, chhungkua, khawtlang, ram leh hnam tan mi ṭangkai nih tum tur te'n a chah bawk.

Govt C. Zakhuma HSS Annual Sports 2023 kharna hunah hian Lalhminghlui, Class-XI 'C' chuan hunserh a hmang a. School Principal Pu Lalnghilhlova Chinzah chuan inlawmna thu a sawi a. Zirlaite aṭangin zai ngaihnawm tak leh lam hmuhnawm takte ngaihthlak a, thlir ho a ni a. Annual Sports lawmman chi hrang hrang sem niin, School Lecturer Pu James Vanlalruata'n lawm thu sawiin hun a khar a ni.

Govt C. Zakhuma HSS hi kum 1999-a din niin, kumin hian zirlai 286 an nei a. Tun ṭum hi annual sports an buatsaih ṭum 23-na niin, annual sports hi August ni 29, 2023 leh September ni 1, 2023 inkar chhung khan buatsaih a ni a. Zirlaite house paliah inṭhenin, item hrang hrang 38 (individual 23 leh major 15) hmangin an inel a. A pum puiah Green House chu House Champion an ni a. Lalhriatchhungi, Green House leh Laldinthari, Black House te chuan gold medal pahnih ve ve lain, Best Girl atan thlan an ni a. Lalhmingsanga, Green House chuan gold medal pahnih lain, Best Boy atan thlan a ni bawk.