Forest Training School-a Trainees Hostel leh Classroom-te hi Integrated Forest Protection Scheme, CSS hnuaia Department-in Cheng nuai sawmpahnih leh a chanve senga an sak a ni a. A tira ruahmanna aia lian leh thazawka sak a ni. He building hawngtu Pu R C Thanga, PCCF leh Secretary, E & F chuan Training School, hmun pawimawh tak maia Department-in hetiang ang building tha leh tlo tur a nei ta chu lawmawm a tih thu leh midangte tan entawntlak a tih thu a sawi a. Principal, Forest Training School leh a thawhpuite chungah lawmthu a sawi a ni. PCCF leh Secretary chuan training zotate fuihna thu sawiin khawvel thang chho zelah he Department-a thawktu hrang hrangte hian intuaitharna neih kan mamawh thu leh a bik takin environment phei chu tunlaia ngaih pawimawh ber leh thu thar nei reng, ram changkang apiang ten an ngai pawimawh a nih thu te a sawi. Training chhuakte chu an thawhna hmuna an kaldarh hunah inpekna thuk zawk nen an thil hriat tharte a taka hmang turin a chah a ni.

Forest Training School-ah hian Director of Forest Education, Ministry of Environment & Forests, Government of India bultumin Department field staff category hrang hrangte tan Refresher Course training buatsaih a ni thin a, tun sorkar kum chhung hian hetiang course hi turn thum neih tur a ni. Tun turn hi a vawi hnihna niin Mizoram hmun hrang hrang atangin Forester 9 leh Forest Guard 15 ten training an nei a. Ni 14 chhung Theory Leh Practical training ngawrh tak pek an ni.

He inkhawm Pu Lalrinmawia IFS, Planning Officer kaihhruaiah hian Pu Lallianzuala, Principal chuan report a pe a. Pu L R Thanga, Chief Wildlife Warden, Pu Rosiama Vanchhawng, CF leh officer dangten thu an sawi a, Department officer leh staff engemawzat an tel a ni. Forest Training School compound hi ngaw tha takin a khuh a, he school atang hian a din tirh 1974 atangin field staff 1324 an training chhuak tawh a ni.