2819/2026-2027

Aizawl the 26th October, 2026: Environment, Forests & Climate Change changtu Minister Pu Lalthansanga chuan vawiin khan I&PR Conference Hall, Lianchhiari Runah Pu Lalrohnuna Ralte Solo Art Exhibition a hawng. Pu Lalrohnuna Ralte hian lemziah bul a tan atanga kum 50-na Golden Jubilee pualin he Solo Exhibition hi a buatsaih a ni.

Minister chuan kum 50 chhung zet lemziaka hun hmang tawh Pu Lalrohnuna Ralte thawhrimna leh taimakna fakin, thangtharte tana Art lama sulsutu pawimawh a ni, a ti a. Mizoram mipuiten painting hlutna kan hriatthiam hma, hralhna tur pawh an la hmuh mang hma atanga vawiin thlenga la tuichilh tlat artist te hlutzia sawiin Mizoram tan rohlu an ni, a ti. Environment leh forest humhalhna kawngah pawh Mizo artist ten an thawhhlawk tiin Pu Lalthansanga chuan enviroment humhalh pawimawhzia thangtharte thinlunga tuh theihna hmanraw pawimawh tak chu lemziak hi a ni, a ti a. Mizorama tourist lo pung zel ten kan hnam nunzia an hriat chak leh an zirchian duh te, kan rama thiltha leh hmunhma mawi tak tak an hawn theih loh leh an fan sen loh te chu painting kaltlangin an hmuin an hawn thei a ni, a ti.

Khual zahawm Pu Vanneihtluanga pawhin thu sawiin lemziaktu ngaihtuahna lairil, mi dangin kan hmuh theih loh chu lemziak hmangin an pho chhuak a; a ziaktu an danglam ang bawkin a entute pawh kan danglam a, chuvangin, painting hlutna tak tak hre thei tur chuan a entuten rilru inhawng takin, lemziak hmanga kawm theih turin kan inhawng tur a ni, a ti. Pu Lalrohnuna Ralte kutchhuak chu belhchian a dawl a, a entute tan tawmpui a awlsam a; a painting hmangin a entute rilruah Mizona a kaitho a, nunhlui min ngaihtir a ni, a ti.

I&PR Director Pi Mina Zoliani Joute pawhin painting hlutna Mizoten kan hriat tak tak hma atanga bul lo tan tawh artist te fakin an teirei peihna zarah thangtharte tan kawng zau tak an hawnsak a ni, a ti. Lemziak mite chu Pathianin a bika talent a pek te an ni a, an thiamna te hmanga mihringte leh Pathian thilsiam dangte duhawmna leh mawina phochhuaktu an ni, a ti. Artist te chu thahnemngai taka hmalam pan zel tura fuihin tihlar leh phochhuah tlak mi tharte dawmkangtu ni zel turin a fuih a; I&PR chu nodal department a nih angin artist te tan englai pawhin an inhawng reng tih hre turin a chah bawk a ni.

Pu Lalrohnuna Ralte hian kum 1976 atangin lem a ziak tan a. Mizoram chhung leh pawnah vawi tam tak painting avanga fehchuak tawhin lawmman engemawzat a lo la tawh a. NEZCC Art Exhibition ah te, Lalit Kala Akademi New Delhi buatsaih Art Conclave ah te a painting hi phochuah a lo ni tawh a. Mizoram leh India inremna, Commemorative Postage Stamp inziahsiakah First Day Cover atan a design thlan niin, Cancellation Cachet atan pawh a design hi thlan a ni.

Vawiin programme hi Pu Rosiamliana Ralte chuan a kaihruai a. Mizoram Art Development Society President Pu Vanlalhriata pawhin thu a sawi a ni.

Mipui a duh apiang tlawh theih tur leh lei theih turin Pu Lalrohnuna Ralte kutchhuak painting sawmli (40) zet Lianchhiari Run Art Gallery, I&PR ah phochhuah a ni.