2820/2026-2027

Aizawl the 26th October, 2026: Vawiin khan Mizoram Handloom & Handicrafts Development Corporation Ltd. (ZOHANDCO) chuan Rulchawm, Saitual District a Beneficiaries thlan chhuahte hnenah puantah khawl an sem. Handloom Production Training ni 45 chhung awh kharna inkhawm an hmang nghal bawk a ni.

Puantah khawl (Frame Loom) semna inkhawm Kaphranga Auditorium, Rulchawm a neih chu Pu Rodingluaia, Asst. Manager (Marketing) chuan kaihruaiin, Pu L.P. Lalchangkima, Managing Director, ZOHANCO chu khuallian niin khawl hi a dawngtu tura thlan chhuahte hnenah a sem a ni.

ZOHANDCO, MD chuan “Mizoram chhungah Puantah leh kut themthiamna chawi kang zel turin ZOHANDCO chuan tha thlah lovin hma a la mek zel a, sulhnu tha tak pawh kan hnuhchhiah mek zel a ni. Kut hnathawktute a bik takin, Puantahtu leh thiamhnangdeh lama ei zawng ten ZOHANDCO Office chu in inpui a ni tih hi hre nawn leh ula, in tan, in mamawh angte phuhru turin theihtawp kan chhuah zel dawn a ni.” a ti.

Kum 2024 atang khan khaw hrang hrangah Handloom Training hi ZOHANDCO hian an lo buatsaih tawh thin a. Puantahtute hian Quality tha, mi dangte hip thei turin puan kan tah chhuah a tul a, kuthnu pawr leh phuailuai tak, a tahtu ten an uluk tawk lo a ni tih chiang taka kan hriat ang chi hi chu awm lo se ka duh a ni, Managing Director chuan a ti bawk.

Puantah khawl semna inkhawmah hian Rulchawm khaw chhunga Puantah lama ei zawng mi thahnem tak an kal khawm a. Puantah khawl 25, Solar lighting System -21 leh Puan Ban khawl – 1 sem niin hengte hi Ministry of Textiles Govt. of India hnuaia Development Commissioner (Handloom) in a kalpui, National Handloom Development Programme (NHDP) Component pakhat Small Cluster atanga pek a ni a, he Small Cluster hi Tawi Cluster hminga kalpui a ni.