No.1485/2020-2021

Nimin 29.5.2020 (Friday) khan Former Legislators Association of Mizoram (FLAM)  chuan an member chatuan ram pan ta  Pu F.Sapa, ex-MLA leh Pu J. Lawmzuala (J.Vala), ex-MLA te ralna hun Lungleia an neih chu Agriculture Minister Pu C.Lalrinsanga’n a hman pui.

Agriculture Minister hian  Covid-19 dona kawnga border area duty te  tlawh a Chawngte leh a chhehvela hun a hman hnuah nimin khan FLAM member pahnih te ralna hun hi a hmanpui a ni.

He inralna hun hi FLAM hruaitu  Pu TC Pachhunga, General Secretary FLAM leh Pu C. Ramhluna ten Aizawl aṭangin an hmanpui a. Lunglei  hmun ṭhu Ex- MLA Pu K. Lalsanga, Pu B. Lalchungnunga, Pu Z.H Ropuia leh Pu Lalrinzuala te an tel bawk a ni. 

Nimina FLAM in an member an ral Pu F.Sapa hi kum 1989 - 1993 chhung khan Lunglei South bial aṭanga MLA atana thlan tlin niin, Mizoram sawrkarah Dy. Govt Chief Whip bakah Lunglei High Powered Committee Vice Chairman te pawh a lo ni tawh a ni a. March Ni 7, 2020 khan chatuan ram a pan ta a ni. 

Pu J.Lawmzuala (J.Vala) hi Pu J. Buana (L) fapa niin Lunglei South Constituency aṭanga MLA lo ni tawh a ni a. Chanmari Branch YMA Lunglei hruaitu hlun leh Adviser te pawh a lo ni tawh ṭhin a ni.

He hunah hian Agriculture Minister chuan thusawiin "Lunglei a kan rohlu, ram leh hnam tana kan rawngbawlpui te Pu J.Lawmzuala leh Pu F.Sapa te vawiin niah FLAM hminga ral anlo ngai ta mai hi  a lunglenthlak hle a , ram leh hnam tana ke anlo pen tawh nate kan hmuhin  an thahnem ngaih thin zia te rilruah alo  thar leh a, vawiin ni ah kan zingah awm tawhlo  mahse  ram leh hnam hmasawn zelna tur atana ke anlo pen tawhna kha kan ngai hlu a kan hrereng dawn a ni," a ti a. 

COVID-19 chungchang sawiin Minister chuan, "He hri leng kara Zofate kan ṭanrual zia lo langchhuak hi a mawiin a hlu a. Buh leh bal chin kawngah nasa takin hnam a harh a, he hripui phenah hian malsawmna a awm a, chu chu ṭanrualna leh taimakna hmangin kan haichhuak tur a ni. Lockdown kan tih rual rualin Agriculture department chuan Farmer te tan Helpline kan buatsaih nghal a. Farmer ten hei hi hman ṭangkai nachang hriain an harsatna te Department mithiamte hnenah an rawn sawi ṭhin a. Chu chu Department hotute nen kan enho leh ṭhin a. Hei hian nasa takin hmasawnna a thlen a. Farmer ten an harsatna leh rawtna an neih te helpline hmanga rawn thlen zel se tih hi kan duh dan a ni. COVID-19 laka kan himna kan ngaihtuah rual hian eitur tlakchhamna laka kan him hi a pawimawh a.  Tunah hian kan ramin Intodelh kawng kan zawh mek a ni" a ti. 

FLAM programme an hman zawh hian Agriculture Minister leh FLAM hruaitute hi Aizawl lam pan in an chhuak nghal a ni.