No.1484/2020-2021

Agriculture Minister, Lunglei 'W' bialtu MLA ni bawk Pu C. Lalrinsanga chuan Mizoram Board of School Education in tun hnaia HSLC Examination Results 2020 a tih chhuah ah a bial chhung aṭanga Top 10-a tling  Lalruatkimi (Bawih Bawihi) d/o Pu Lalmuankima, Kikawn, Bazar Veng, Lunglei chu nimin May Ni 29, 2020 khan an chenna ina kal chilhin lawmpui nan Laptop a pe. 

Minister thilpek hi Lalruatkimi pi, Pi R. Lalnuntluangin a tunu aiawhin a dawng a ni. 

Minister chuan a bial chhung ngeia zirlai chhuanawm tak an nei hi lawmawm a tih thu a sawi a. Hetiang result nei tura Lalruatkimi thawhrimna bakah a chhungte support-na ropui a tih thu sawiin, "Kan tih tur hria a, result ṭha mai piah lamah ei tling tura ram leh hnam rilru pu chunga theihtawp chhuah hi zirlaite tih makmawh a ni" a ti.