FLAM (Former Legislators Association of Mizoram) General Body Meeting chu vawiin chhun khan I&PR Auditorium ah neih a ni a. FLAM constitution siam that chungchang ngaihtuah ho a niin hemi bakah hian welfare fund, annual fee, inralna leh member te leiba chungchang te sawiho a ni.

Meeting hi chawhma lamah FLAM President Pu K.L.Rochama’n a kaihruai a. Pu S.T.Rualyapa, Ex-minister-in Hunserh a hmang a. Thuchah sawiin Pu Rochama chuan FLAM member te chu ram hruaitu atan mahni hun theuhva Pathian ruat an nih angin tha thlah mai lova, ram tana thawk zui zel turin a sawm a. “Zofate lungrual taka Mizorama kan chen ho theihna turin keini Valupa te hian ngaihtuahna i seng ang u” a ti a. Mizoram muanna boruak venghim zel tur leh ram hausakna sem rual a nih theih nan hma la turin FLAM member te chu a ngen bawk a ni.

FLAM General Body meeting ah hian kumina an member thite, Pu H.Lalsangzuala, Pu H.Hrangdawla, Pu H.Vanlalauva leh Pu C.Pahlirna te sunna hun hman a ni a. Pu K.Thangzuala, Treasurer leh Dr.J.V.Hluna General Secretary ten report an pe a. Tun hnaia MLA pension tihpun leh an hamthatna tur dangte siam sak an nih avangin FLAM member te chuan Mizoram sorkar chungah lawmthu an sawi a. FLAM office atan Assembly annexe building ah room leh a chhung bungraw mamawh te ngaihtuah sak an nih avangin lawmthu an sawi bawk a ni.

FLAM member te hi mi 115 niin vawiina an inhmuh khawmna ah hian Ministry  hmasa bera MLA lo ni tawh enge maw zat an tel thei a. MLA 51 leh MP 5 an boral tawh a ni. Meeting hi Dr.Kenneth Chawngliana, Vice President in chawhnu hun a kaihruai a. Pu K.Sangchhum, General Secretary in lawmthu sawiin hun hnung a khar a ni.