Free Animal Health Camp Kolasib District AH& Vety buatsaihin vawiin March 21 khan Bilkhawthlir ah neih a ni a, Ran 300 chuang an en.

Vawiin a Free Animal Health Camp hi Kolasib DVO Dr. Saihlira hovin Kolasib District Vety a thawkten Bilkhawthlir BNRGSK building ah an nei a. A hmunah hian Ran engemaw zat an en bakah, Vety a thawktu ten ran vulhtute ran vulhna hmunah an kalchilh bawk a. Ran 300 chuang an en a, damdawi pawh a thlawnin an sem bawk a ni.

Dr.Saihlira chuan Central leh State Sorkar in ran vulhtute a ngai pawimawh em em a, Free Clinic pawh hi Central Project “ Assistance to State for Control of Animal Disease” (ASCAD) hnuaia buatsaih a ni, a ti. Bilkhawthlir chu Kolasib District chhung ah Bawnglian Vulh thathnem na khua an nih thu leh Kolasib Dairy Plant ah pawh bawnghnute chhung tha ber khua te zing ami an nih thu sawiin NLUP ti tha khua an nih thu a sawi bawk.

Bilkhawthlir North VCP Pu Lianthuama pawhin thu sawiin Bilkhawthlir khua chu ran vulh leh kuhva huante nen hian a in zawm tlat a ni, a ti a, ran vulhtu te tana hamthatna awm theite hi mipui tan hriat mai a harsat thin avangin hemi kawnga fin chhuah thin turin Department hotute a ngen a ni.

Naktuk hian Kolasib District chhung Bualpui ah Free Health Camp hi neih chhunzawm leh a ni ang.