Smile Train of India leh 42nd BN BSF tangkawp chuan “Smile For All” tih thupui hmangin Greenwood Hospital-ah cleft lips (hmui kak) a thlawna zai runpui an nei. He camp hi Dr Arun Ganguly-an hovin, ni hnih (10th leh 11h March, 2014) chhung neih a ni a. C.P. Saxena, Commandant, 42nd BN BSF, Tuirial leh K.Rozama, Managing Director, Greenwood Hospital ten he camp hi an hmanpui a ni.

Smile Train hi international children’s charity organisation niin, kum 1999 khan cleft lips neite tan liau liau a din a ni a. Tualchhung doctor-te nena thawk hovin, tunah hian ram thang mek 85 chuangah hna an thawk mek a. India ramah pawh Smile Train of India tih hming puin kalpui a ni a. Ramchhunga cleft lips nei naupang ten endawn leh hmuhsit an tawh loh nana thawh leh cleft lips nei naupang zawng zawngte tuamchhuah vek an tum a ni. Smile Train of India hnuaiah hian Inzaina senso tur neilo te a thlawna zai thin an nih bakah an kalna senso pawh tumsak thin an ni.

Kum 2000 March atang khan khawvel pumpuiah naupang 875,000 chuang an zai tawh a, India ramah chuan naupang 325,000 chuang hlawhtling taka zai an ni tawh a ni.