Aizawl District Election Officer Dr.Franklin Laltinkhuma chuan vawiin chawhma khan a pisaah thuthar lakhawmtute kawmin Lok Sabha inthlan lo awm tur atana hriattur pawimawhte a hriattir.
Mizoram Lok Sabha, 2014 inthlanpuiah Dr.Franklin Laltinkhuma, Aizawl DC chu Mizoram Parliamentary Constituency atan Returning Officer a ni a. District dang zawng Deputy Commissioner-te chu Asst.Returning Officer an ni ang. Anni bakah hian Aizawl District-a Addl.Deputy Commissioner pahnihte chu Asst.Returning Officer an ni bawk a ni.
Inthlan puan ni, 5.3.2014 atangin Model Code of Conduct (MCC) chu Mizoram pumah hman nghal a ni a. Mizoram chhunga District 8-ah hian Polling Station 1,126 a awm a ni. Aizawl District ah Polling Station 323, Mamit District-ah 110, Kolasib District-ah 76, Champhaiah 133, Serchhip District-ah 77, Lunglei District-ah 175, Lawngtlai District-ah 159 leh Saiha District-ah 73 a awm a. Tun dinhmunah Mizoram puma voters awm zat chu Aizawl District-ah 2,62,229, Mamit District-ah 58,408, Kolasib District-ah 52,292, Champhai District-ah 79,155, Serchhip District-ah 45,734, Lunglei District-ah 96,054, Lawngtlai District-ah 72,106 leh Saiha District-ah 34,444 niin Mizoram pumah voters 7,00,422 an awm mek a ni.
MLA inthlan hnuhnung bera Electronic Voting Machine hman chu Court Case a awm avangin hman theih a ni dawn lova, inthlan hmasaa EVM hmanloh leh Court Case nei lo zawng hi Arunachal-ah thawn tura ruahman a ni. Aizawl District tan EVM 456 (C.U) leh 456 (B.U), Bharat Electronics Limited (BEL) Company siam hman a ni dawn a, Maharastra atanga rawn phurh thlen a ni tawh.
Election Commission of India thupek angin Lok Sabha inthlana Candidate te sum hman dan thilthlai tur Flying Squad, Static Surveillance Team, Video Surveillance Team, Video Viewing Team leh Accounting Team te din a ni ang a. Print leh Electronic Media a campaign nana candidate leh party-te sum senfo enfiah tur Media Certification and Monitoring Committee din a ni bawk ang. Mizoram Parliamentary Constituency a candidate sum hman theih zat chu cheng 70,00,000 thleng phalsak an ni.
