Sorkar laipuia Ministry of Drinking Water & Sanitation chuan August ni 9-15, 2017 chhung hi Freedom from Open Defecation (Khawlaia inthiar awmlohna) hapta ah a puang a. He Programme hi India ram pum khawlaia inthiar awm tawh lohna (Open Defecation Free) a nih thuai theih na atan hmalakna kawng khat a ni a. Mizoramah pawh he Week hi District hrang hrang ah uar taka hman tura ruahman a ni.
Aizawl District chu Open Defecation Free-a puan tawh a nih angin vawiin atang khan he week hi Swachh Bharat Mission (Gramin) Programme hnuaiah District, Block leh khaw hrang hrangah a hawnna programme buatsaih a ni hlawm a. Week hawnna ni pah fawmin vawiin dar 9:00 AM khan Aibawk -Muallungthu inkarah Chhimphei leh Hmuifang Group Y.M.A tan Marathon Race buatsaih a ni a. Hetah hian mi engemawzat telin, Aibawk ah lawmman semna Member Secretary, Swachh Bharat Mission (Gramin), Aizawl District leh BDO, Aibawk R.D. Block ten an nei nghal a ni.
Freedom from Open Defecation Week chhung hian Aizawl District chhunga Y.M.A Branch zawng zawng te pawh khawlai tihfai hnatlang nei tura beisei annih bakah Aizawl District boundary leh hmun pawimawh laiah Banner tar a ni a, Motor-ah Pamphlet-te sem niin, Sumo leh Taxi-ah te pawh Poster hrang hrang tar a ni bawk. He Week hi Aizawl District chhunga BDO tinte pawhin an Block huamchhungah programme siamin ropui takin an hmang mek bawk a ni.
