Vawiin chawhnu khan Serchhip P & E Veng YMA Hall-ah NLUP tanpuina thawhhnihna leh thawhthumna chu Beneficiary te hnenah semchhuah niin he hun hi Chief Minister Pu Lal Thanhawla'n a hmanpui.

Serchhip District chhunga NLUP tanpuina dawngtute fuihna thu sawiin Chief Minister chuan NLUP chu khawvel in a hre tawh a khawvel in tha a tih thu a sawi a. Mi khawsak harsa leh rahbi tleu tawh te kaihthawhna atan a tangkai a ni tih UNO hial pawhin a hriatchian em avangin Mizoram sawrkar rawn thawhpuiin Aizawlah office neia inbengbelin sawrkar nen an thawk dun mek zel a ni a ti a. Khawvel in a buaipui Global Warming, ramngaw chereu mek zel, boruak hip tur thianghlimlo mek zel, tuihna kiam mek, ei leh bar tlakchhamna bakah mihringte insiamchawp harsatna hrang hrangte tana damna leh siamthatna hna te chu  NLUP hmalakna leh a thiltum ah hian a awmkim deuh vek a ni a ti.

District anga tanlak tulna lai te sawiin Chief Minister Pu Lal Thanhawla chuan Serchhip District mipuite chu ram laili a awm an nih avangin eizawnna kawngah te, hriselna kawngah te, faina kawngah te leh khawtlang nun siamthat kawngah te Mizoram hmundang te entawn ni tura tanlak nachang an hriat a ngai a ti a.

Commerce & Industries Department hnuaia NLUP  tanpuina semna hun hi Pu J.Hmingthanmawia, Director, Commerce & Industries in a kaihruai a. DIC  Serchhip atanga Technical Report ngaihthlak a nih hnuah Chief Minister Pu Lal Thanhawla hnen atangin NLUP Beneficiary ten tanpuina sum hi an dawng a. New Serchhip North leh New Serchhip South Village Council te hnenah Chief Minister chuan Computer set a sem nghal a ni.

Vawiina  Commerce & Industries Department hnuaia Serchhip District chhunga NLUP tanpuina hi  Trade 24 a beneficiary 342  te hnenah semchhuah a ni a.  3rd Phase final instalment leh 4th phase 2nd installment atan sum semchhuah hi  azavaiin Rs. 153, 03, 720/-  sem a ni. 3rd Phase final installment bikah beneficiary mi 183 hnenah tanpuina pawisa semchhuah zat chu Rs. 60, 38, 376/- a ni a. 4th phase 2nd  installment ah bik chuan beneficiary 159 te hnenah Rs. 92,50,000/- sem a ni thung.