Vawiin khan Government Kolasib College chuan Parish Hall, Venglai Kolasib-ah Freshers’ Social hun an hmang a, Pu R. Romawia, Higher & Technical Education Minister chuan khuallian niin a hmanpui. 

Pu. R. Romawia chuan hlawhtlinna chu zirlai mimal tinte mawhphurna a nih thu a sawi a, Freshers’ lawmluh te senior te leh mi hlawhtling tawhte entawn a, taimakna leh rinawmna nena an mawhphurhna hlen turin a fuih a. Mizote hmasawn zel turin rilru tuaiharhna leh insiamthatna kan mamawh a ni a ti a. Science zirna leh thiamna lamah a bikin tanlak a ngaih thu a sawi bawk. Minister chuan zirlai te tumruhna, huaisenna leh rinawmna nen hmalam pan zel turin a fuih a ni. 

Vawiin hunah hian Govt. Kolasib Students Union buatsaih Magazine ‘Hlimthla’ chu Minister hian a tlangzarh nghal bawk a ni. Vawiin Freshers’ Social hun ah hian Govt. Kolasib College Alumni atang leh zirtirtute atangin fuihna thu ngaihthlak a ni. 

Fresher Social hun hman zawh hian Minister hian Khuangpuilam, Kolasib a Govt. Kolasib College ram chu a hmunah enin, tehfel ngai leh tihfel ngai laite hmalak dan tur College hotute leh Asst. Settlement Officer te a sawipui nghal a ni.