Nimin a District Sports Stadium, Silchar a Kolasib XI leh Silchar XI ten Friendly Match hmuhnawm tak an khelh ah Kolasib XI te 3-0 in an chak.

Football khelh tan hma hian Kolasib DC Pi Niharika Rai chuan thu sawiin, State pahnihte inkara inunauna tha tak awmtir hi kan duh ber a ni a ti a. Tunah leh hun lo kal zel turah chi leh chi, hnam leh hnam inkarah boruak tha awm zel rawh se a ti a ni. Cachar DC Pu H.K. Dev Mohanta pawhin thu sawiin State pahnihte inkara inunauna thlentir tura Football match buatsaih chu a taka hlawhtlintir turin mitin ten tan ila ang u, a ti.

Boruak nuam tak hnuaiah chawhn dar 2:45 ah inkhelh hi tan a ni a. Second half ah Kolasib XI te hian goal 3 pet lutin hnehna an chang a ni.

Kolasib atangin SP Pu Madhur Verma bakah Kolasib atangin Department officer te, Town Zone Football Association hruaitute leh Football ngainatu mi 160 vel inkhel en hian an kal a ni.