131/2024-2025 

Aizawl the 10th April, 2024 : Tun hnaiah Tamil Nadu-a FSs (Flying Squads) / SSTs (Static Surveillance Teams) ten khualzin (tourist) te kut atang pawisa tam tak an man sak tih Election Commission of India beng a thleng a, ECI huan hei hi a ngai thutak hle a ni. Khualzinte hi India ram hmun hrang hrang tlawhin an zin kual thin avangin an veivahna, ei leh in bakah thlen man tur pawisa aengemaw zat an pai a ngai thin a, heng atan hian document an neih kher hi a tul lo a ni. Chuvangin anmahni kha khualzin an ni ngei a, an chet velna chu inthlanpui nen a inkaihhnawih lo a ni tih finfiah felfai mai kha a tawk a, tul lovah an tan harsatna dang thlen loh tur a ni.

ay ni 29, 2015-a ECI in SOP a tihchhuah [Annexure G7 of Compendium of Instructions on Election Expenditure Monitoring (January, 2024)] ah chuan Candidate, Agent, Party Worker ten tum khatah tangkafai Rs 50,000/- aia tam an pai thiang lova, party bungrua pawh tum khatah Rs 50,000/- aia tam phurh phal a ni lo. Hei hi phal chin bak aia tam sum dik lo taka hman ven a nih theihnan ruahman a ni.

FS/STT zawng zawng hi district-a senior officer, a bika ruat ten an ho thin a, videographer leh police ralthuam keng ten an puibawm thin a ni. Chuvangin endik hna pawh taima tak leh hawihawm takin, midangte zah thiamna nen an kalpui thin tur a ni. An lakah mipuite lungawilohna a thlen loh nan District Election Officer leh Superintendent of Police ten uluk takin FSs (Flying Squads) / SSTs (Static Surveillance Teams) te hnathawh dan an vil thin tur a ni a, SOP zawm lo FSs/STTs officialte chungah dan angin hremna lek a ni ang.

Election Commission of India chuan lehkha (No.76/ECI/SOP/EEM/EEPS/2023, dated 23rd November, 2023) kaltlangin district tinah “District Grievance Committee” din turin thupek a chhuah a, hei hi mipuite tan harsatna thlen a nih loh nan leh an harsatna tawhte chinfel zung zung a nih theihnan a ni. ECI chuan District Election Officer-te hnenah he Committee din a nih thu hi mipuite hnenah puangzar turin a hriattir a, Committee Convener biak pawhna tur telephone number pawh tarlang turin a chah a ni. A hun leh hmun ruat lawk saah nitin vawi khat an thu tur a ni a. Chief Electoral Officer-in District Grievance Committee-te chu tha takin hna an thawk em tih a vil tur a ni a, thutlukna siam ngai pawh tikhawtlai lovin rang takin an chingfel zung zung tur a ni.