132/2024-2025 

Hnahthial the 10^th April 2024: Election Commission of India chuan kumin MP inthlanpuiah mi zawng zawngin intluktlang tak leh ko kim taka vote an thlak theuh theihna turin Kum 85 chin chunglam (Senior citizens) te leh vohbik (Persons with Disabilities) te tan mahni inlum atang ngeia vote thlak theihna (home voting system) a ruahman a, chumi zulzui chuan Hnahthial District, 29-South Tuipui (ST) AS huam chhunga mahni in atanga vote thlak dilna thehlut vote thlak tir tura ruat polling official-te chu tukin zing dar 6:30 khan DC Office tualzawl atangin Sub Deputy Commissioner Pi Betty Lalrinfeli chuan a vailiam.

Kum lama upate leh vohbikte tana mahni in atanga vote thlak hi Form 12D hmanga dil a ni a, BLO ten an bial theuhah dilna hi lakhawmin endik a nih hnuah pawm an ni. 29-South Tuipui Biala dilna thehlut mi 7 te hi kum 85 chunglam vek niin South Vanlaiphai-ah mi 4, Muallianpui-ah mi 1 leh Hnahthial khaw chhungah mi 2 an ni. Vawiina Polling official kalchhuakte chuan dilna thehlut mi 7 te chu an khuaa an chenna inah kalchilhin vote an thlak tir dawn a, secrecy of voting bawhchhe silovin an vote thlak lai chu videography a cover vek a ni dawn bawk a ni.