665/2025-2026

Lunglei, 2025 Ṭomir thla ni 30: Vawiin khan Lunglei District Disaster Management Authority (DDMA) Chief Executive Officer Pi Rochuangkimi Khenglawt chuan fur laia chhiatna thleng thei hrang hrang lakah Lunglei mipuite fimkhur tura chahin, he'ng a hnuaia tih tur leh tih loh turte hi uluk taka zawm turin mipuite hnena ngenna leh hriattirna a chhuah.

A. Tih tur leh tih loh tur:

1. Ṭhenawm khawvengte tana hlauhawm tur khawpin in sakna hmun tur laih loh tur a ni.

2. I inah tuidawn mumal tak siam la, tuidawn hi ruahtui lak nan chauhva siam lovin, i in kual chhuakin siam ang che. Tuidawna tuite chu a rem laiah khawhtir mai lovin, tuizem/tuihawk luan kawrah chauh hawtir ang che.

3. Tui chhe paihna mumal lo hian lei min a thlen theih avangin i in chhunga tui hman - tui chhia chu tuihawk luan kawr thlengin pipe mumal takin put mai lo turin paih ang che.

4. Tuihawk luan kawr mumal lo avangin lei min tam tak a thleng ṭhin a, i in bulah tuihawk luan kawr mumal takin siam la, siam sa a awm a nih pawhin bawlhhlawhin a hnawh em tih en fiah ṭhin tur a ni a, kawrpuia luang lut thei turin hai fai ṭhin tur a ni.

5. Tui luan kawrah bawlhhlawh paih loh tur a ni.

6. Septic tank put hian lei chhungril a ti hnawngin, lei min a siam ṭhin a, i soak pit a ṭha em tih a khat tawkin thlithlai ṭhin ang che.

B. Ruah nasa taka a lo surin:

1. I awmna leilung chu zir chiang la, hmun awih, tun hmaa lei minna leh lung tlak tawhna hmunte hi a min leh mai duh avangin fimkhur rawh.

2. Tui luan dan uluk takin thlithlai la, i chhehvelah thingkung leh ban awm, tlu mai thei leh chenna in tichhe thei a awm em tih en fiah la, lei min tenau leh hnawmhnawk tawlh mai thei a awm leh awm loh thlithlai reng ang che.

3. A hnuaia mite hi hmuh theih leh hriat theiha a awmin, i awmna leh a chhehvel lei chu a chein, min mai hlauhawm a ni tih hria ang che.

a. Tukverh leh khawngkhar khar a harsa a, chokut inlak hleih a awmin.

b. In bang leh ruhrelah khi a awmin.

c. Kalkawng leh leiah khi a awmin.

d. Lei hnuaia tui pipe leh thil dang ṭangkai a chhiat fovin.

e. Hmun ro ṭhin laiah tui hna hnar a lo awmin.

f. Ruah sur lai emaw, a sur zawh emawa lui tuite a kam phutin.

g. Pal, lungrem leh electric bante a awn emaw, a tawlh sawn emawin.

C. Lei min leh lei tawlh a awm laiin:

(I) In chhungah i awm a nih chuan:

1. I awmna in chu a him tawk nia i hriat chuan pawnah chhuak suh ang che.

2. Dawhkan leh furniture nghet deuh hnuaiah awm ang che.

(II) Pawnah i awm a nih chuan:
1. Lei min leh lei tawlhna tur zawn hlat thei ang berah inthiar fihlim ang che.

2. Lei tawlhna zawnah i awm a nih chuan hmun him lam pan vat tur a ni.

3. I inthiar fihlim hman tawh lo a nih chuan ṭhu tung chungin kun la, i kut pahnihin i lu veng ang che.

D. Lei min hnuah:

1. Lei min tawhna chu a min belh leh theih avangin, lei minna hmun hlat thei ang berah awm tur a ni.

2. Lei minna bulah hliam leh tang an awm leh awm loh finfiah la, i thiam a nih chuan a ṭul dan azirin First Aid pe ang che.

3. Rualbanlo, tar chak lo leh naupangte chu hmun him lamah thiar chhuak hmasa ang che.

4. Khaw chin thupuan ngaichang reng ṭhin ang che.

5. Tui pipe, electric hrui, telephone hrui leh thil dang ṭangkaite a chhia a nih chuan a enkawltute hnenah hrilh vat tur a ni.

6. I in leh a velte lei minin a tihchhiat leh chhiat loh ngun takin thlithlai ṭhin ang che.

I chhehvela lei chu min mai hlauhawma i hriat chuan a hnuaia number tar lan leh mahni veng bialtu Zonal Officer-ah ṭheuh report vat tur a ni e.

(1) DEOC No - 0372-2323635
(2) Toll Free No - 1077