351/2025-2026

Champhai, 28th April 2025: Vawiin khan Champhai District Disaster Management Committee (DDMC) chu an Chairman, Bawrhsap Pu Mohammad Aaquib hovin DC Conference Hall, Keifangtlangah an ṭhukhawm a. Furpui lo thleng tur atana inbuatsaih dan tur bakah he mi kaihhnawiha sawrkar department leh khawtlang hruaitute thawhho dan tur te an sawiho a ni.

Ṭhutkhawm kaihruaitu Pu Mohammad Aaquib chuan furpui lo thleng tur atan inpuahchahna chak taka kalpui a ṭul tih sawiin, chhiatna hrang hrang thleng thei laka mipuite an lo him theih nan theihtawp chhuaha inbuatsaih a ngai a ni, a ti a. He mi kawngah hian DDMC member-te thawhpuina a ngen a ni.

DDMC hian chhiatna lo thlen palh a rang taka che chhuak nghal thei turin District Emergency Operation Centre (DEOC) chu Quick Response Team (QRT) ten engtik lai pawhin (24x7) ṭhutchilh se tiin an rel a. DEOC awlsam zawka biakpawhna tur phone number ruahman te; QRT leh Aapda Mitra bakah Village Disaster Management Committee te tan training buatsaih te an rel bawk. Hei bakah hian leimin, tuilian leh tuihawk ten vantlang kawng an tihchhiat loh nana hmalak dan tur te, electric hrui leh ban chhia leh tlu mai thei enfiah dan tur te, fur laia tui thianghlim in tur a awm reng theih dan tur te an sawiho bawk a ni.

Vawiin ṭhutkhawmah hian Champhai SP Pu Shivendu Bhushan bakah DDMC hnuaia department aiawhte an tel a ni.