‘Imperial Blue Super-5 Futsal Tournament 2017’ chu nizan khan Chawlhhmun Basketball Court-ah khelh zawh a ni a, he Tournament hmawrbawkna hun hi Pu Joseph Lalhimpuia, Parliamentary Secretary-in a hmanpui.           

Tournament final khelh hma inkhawm neihah Pu Joseph Lalhimpuia chuan thu sawiin Futsal hi game rang tak, Mizo pianphung nen inhmeh tak a ni bawk a, chuvangin  Futsal-ah India ram aiawhin international level-ah Mizo hlangin an la khel lo vang tih hi a sawi theih lo a ti. Mizo infiammite chu Mizoram leh ramchhung mai ni lovin khawvel huap pawhin an lan theih ngei a beiseiawm hle a ni a ti. 

Imperial Blue Super-5 Tournament-ah hian team 318 an tel a, Mizoram-a Tournament awm tawh zawng zawnga team tel tamna ber a ni nghe nghe. Tuithiang Games & Sports Association buatsaih he tournament final-ah hian Goodwill FC, Tuikual chuan Mahlui Memorial FC, Armed Veng chu si 2 faia hnehin an champion a. Champion team hian tangkafai Rs. 35,000/- bakah Trophy leh Certificate an dawng a, Runners Up-in tangkafai Rs.20,000/-, Trophy leh Certificate an dawng thung. Best Goalkeeper chu Vanlalhriata, Goodwill FC, Tuikual a ni a; Rs. 3000/- leh Trophy a dawng a; Top Scorer Alan Lalhriatpuia, Armed Veng-in Goal 10 a thun a, Rs. 3000/- leh Trophy a dawng bawk. Best Player-ah David Vanlalruata, Goodwill FC, Tuikual thlan a ni a, Rs. 3000/- leh Trophy a dawng a ni. He Tournament-a team tel zawng zawngten Jersey leh  Rs. 500/- an dawng theuh bawk.  

Futsal hi 1930 ah Uruguay-ah khelh tan a ni a, FIFA nen kum 2000-ah inremna neiin International level-ah khelh tan a ni.