3013/2022-2023
Aizawl, the 10th December, 2022: India in G-20 Presidency dinhmun a chelh chungchanga G20 meeting peng hrang hrang thlen tur inbuatsaihna kal mekah nimin (9.12.2022) tlai khan Prime Minister Pu Narendra Modi chuan State leh UT tin Governor/ Lt. Governor leh Chief Minister te video conference a neihpui a. Chief Minister Pu Zoramthanga pawh a tel a ni.

Union Home Minister Pu Amit Shah chuan he meeting hi a kaihruai a. Indian Emissary to G20 Pu Amitabh Kant chuan G20 meeting thleng tur state te tana hriat tur pawimawh hrang hrang te tarlangin presentation a pe a.

Prime Minister chuan state tin thawhhona a pawimawh thu sawiin, G20 Presidency India in a chelh chhung hian khawvel hmuh ah India ram hmasawnna leh ropuinate phochhuahna hun tha a ni tih hria in, mitin lungrual leh thahnemngai taka thawhho pawimawhna a sawi a. State hrang hrang mawina leh potential te pholan nan India ram khawpui hrang hranga meeting hmun ruahman a nih dan sawiin, state tin ten an theihna lo phochhuak a, hmasawn an remchangah an hman ngei a beisei thu a sawi.

Mizoram chu March 2023 thla ah B20 meeting thleng tura ruahman a ni a. He multilateral business partnership session hi insumdawntawnna leh thawhhona chungchang sawihona niin, bamboo/ horticulture, handloom leh handicrafts bakah nursing & paramedics te thlurbing bik a ni ang.

Meeting ah hian Chief Minister chu Chief Secretary Dr. Renu Sharma, Mizoram Nodal Officer Home Secretary Pu H. Lalengmawia, IGP (Intelligence) leh Home dept leh Commerce & Industries dept hotute an tel a ni.

G-20 hi ram 19 leh European Union te'n khawvel pum economy a harsatna thlentu hrang hrnag sutkian leh hmasawn tlan theihna tura forum din a ni a. Member-te chu Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, United Kingdom, United States leh European Union an ni a. India in Presidency a chelh chhung hian Prime Minister Pu Narendra Modi chu G20 Chairman a ni.