3012/2022-2023
Aizawl, the 10thDecember 2022 : Vawiin khan MZP Conference Hall-ah Lengteng bial chhung leh Sialkal Range Development Council (SRDC) area huamchhunga zirlai thiam thei, First Division leh a chunglam pass, chhungkaw harsa thlanchhuah zirlai 38 te hnenah tanpuina sum pek a ni.

He hunah hian Lengteng bialtu MLA leh SRDC Chairman Dr. L.Thangmawia chuan thu sawiin chhungkaw harsa tak atanga lehkha zir a nih thin thute, retheihna hi zirna hlawhchham phah nana chhuanlam tling lo a nih loh thu te sawiin kan lehkhathiam hmasa chhuanawm tak takte kha retheihna hneha hlawhtlinna chang an ni deuh vek a ni a ti a. Dr. L. Thangmawia chuan kum 2018 khan Assembly Committee pawimawh tak General Purpose Committee, Speaker kaihhruai, Chief Minister pawh a telna chuan MLA Fund hman theihna pakhat “GIA to Educational Insitutions” tih thin chu “GIA to Education” ti a thlak turin thutlukna a siam ta a. Chuvangin zirna in (Institution) chauha MLA Fund hman theih thin kha zau zawkin zirna lamah a hman theih ta niin a sawi.

Lengteng bial MLA Fund pawh zirna lam atan hman a nih thu sawiin a changin zirtirtu indaih loh rawih nan te, IAS nih tum puih nan te, sikul mamawh Computer leh Cooler lei nan te, Sikul te Sports a an tel theihna atan te, sikul building sak nan te leh zirlai harsa tanpui nante, bialchhunga zirlai pawl hrang hrang tanpui nan te tangkai takin kan hmang chho mek zel a, a vaia kan hman hi cheng nuaih tam tak a ni tawh tiin a sawi a. MLA Fund nasa taka zirna lama kan hman theihna chhan hi Lengteng bial mipuite vang a ni a, an chungah pawh lawmthu ka sawi mawlh mawlh a ni, a ti bawk.

MLA Fund atanga zirlai tanpuina hi BDO, Ngopa Chairman-na hnuaiah a thlang tur committee awmin First Division-a pass chin, chhungkaw harsa atanga thlan an ni a. Kum 2019 khan zirlai 13 tan Rs 2,10,000, kum 2020 khan zirlai 18 tan Rs 2,50,000 sem a lo ni tawh a. Hripui leng avangin kum 2021 khan sem a ni lo va. Kumin 2022 hian zirlai 29 thlanchhuah te tan Rs 3,94,000 sem a ni. SRDC Fund atanga zirlai tanpuina hi SRDC hnuaia Hostel & Education Committee-in a thlante an ni a. Kum 2020 khan zirlai 15 te tan Rs 2,00,000 sem a ni a. Kumin 2022 hian zirlai 9 te tan Rs 1,16,000 sem chhuah a ni.

He inkhawm hi Pu Remlalliana Hnamte, Development Officer, SRDC in a kaihruai a, Rev K.Lalpiangthara’n hunserh hmangin report ngaihthlak chhunzawm a ni a, Pu. K.Biakthianghlima’n zirlai fuihna thuchah sawiin zirlaite hnen atang pawhin thusawi ngaihthlak a ni a; Pu F.Lalnunmawia, Consultant SRDC in lawmthu sawiin hun a khar a ni.