No.4687/2020-2021

Dated Champhai, the 2nd September, 2020: Vawiin chawhma khan Champhai District Level Coordination Committee on Civil Registration System of Births & Deaths chu Bawrhsap Pi Maria C.T Zuali, District Registrar of Births & Deaths kaihhruainain DC Conference Hall-ah hmalak dan tur hrang hrang ngaihtuahin an thukhawm.

Pi Maria C.T Zuali chuan District Level Coordination Committee on Civil Registration System of Births & Deaths hnuaia meeting pawimawh tak koh ani chu lawmawm a tih thu a sawi a. Pian kum dik tak ziah leh document felfai leh rintlak tak siam a pawimawh thu sawiin, kristian ram kan nih avangin entawntlak leh rinawm taka kan awm angai a ni, a ti a. A duh duhin document lem an siam lohna turin hemi kawnga thawktu leh mawhphurhna chelhtu hrang hrangte tanrual angai hle a ni, a ti bawk. District Registrar of Births & Deaths chuan Statistical data rintlak leh belhchiandawl tak nei tura tanlak angaih thu pawh sawiin, department hrang hrang leh Economics & Statistics department-te inkarah thawhhona tha tak a awm zel a tul thu sawiin, data hrang hrang danglam nuaih nilo Mizoram pum anga inhman tawm theih tur duan kawngah chak taka hmalak zel a tul thu a sawi bawk.

He hunah hian Pu B.Lalrinhlua, Joint Director, Economics & Statistics Department chuan department hrang hrangte nena inrawntlangin Mizoram Statistical Data duan a ni, a ti a. Mizoram Statistical Data-ah time series data chhungluh thin anih thu leh Mizoramdata.in ah en mai theiha chhawpchhuah anih thu a sawi bawk.

Meeting chuan agenda hrang hrang chhawpchhuahte ngun taka a ngaihtuah hnuah veng/khaw tina Registrar of Births & Deaths (RBD) te thla tina lawmman lak thin Rs 350/- chu Rs 1,000/- a tihsan anih theihna tur leh RBD te’n Certificate pakhat zel an issue-ah kut hah man Rs 10/- zel an dawn theihna tura thuneitu sang zawk Inter Departmental Coordination Committee (IDCC) hnena thlen nise a ti a. School hrang hrang Admission tihnaah leh Board Examination neih hunahte pian kum, thla leh ni te Birth Certificate a inziak nena inmil thlapa thehluh zel anih theihna tura khawng taka endikna kalpui thin nise tih a ni bawk. Meeting-ah hian Khawzawl leh Saitual district chhunga rinluh tak khaw hrang hrang District Research Officer Champhai enkawlna hnuaia la awm mek te’n document mamawh an neih bawhzui kawnga harsatna an tawh lohna turin hmalak nise tih a ni a, DRO Office dawr tur te’n dilna leh document-te online hmanga an thehluh hmasak theihna tura hmalak dan turte pawh sawiho niin, Common Service Centre leh NIC e-district kaltlanga thawhho theih dan turte ngaihtuahho ani bawk. Meeting chuan Electoral Roll hearing neih hunah Asst. District Registrar of Births & Deaths/ District Research Officer Staff-te tel ve nise tih chu ngun taka ngaihtuah hovin Births Certificate lem leh tak dapchhuah anih theihna tura tangkai tak tur anih hriain a remti bawk a ni.

Meeting-ah hian Birth Certificate pekchhuah kawngah leh endik hna kalpui danah Digitalisation hmang veka hna thawh anih tawh avangin Certificate lem leh tak hriat hran a awl tawh thu tarlan niin, CJM Champhai Pi Lalrochami Ralte hnen atangin Birth Certificate lem siam manchhuah case siam sak an awm zeuh zeuh thu leh tunhnai maiah pawh hetiang ti manchhuah chu thiamloh chantira thla ruk chhung Jail tang tur leh Rs 5,000/- chawi tura hremna pek anih thu ngaihthlak a ni a. Meeting-ah hian Birth Certificate-ah pa hming a chuan ngei angaih thu tarlan a ni a, Delayed birth Certificate dilna thlitfim leh Certificate lem dapchhhuah kawnga hmalak a tulziate chipchiar taka sawiho a ni bawk.

He hunah hian Pu Mark Lalthanliana Addl DC, Pu B.Lalrinhlua, Joint Director, Economics & Statistics department, Pi Lalrochami Ralte CJM, Pu Lalnunfela Chawngthu SDO Sadar, Dr R.Lianmawia CMO, Pu TT Laltanpuia DEO, Pu Saidingliana Sailo, District Research Officer leh Official dangte an tel a ni.