No.4396/2021-2022
Aizawl dated 25th March 2022: Vawiin chawhma khan DC Conference Hall, Kolasibah Kolasib Town Sanitation Task Force-te chuan thutkhawmna neiin ‘Garbage Free City’ ni tur a Kolasib khaw chhung a faina uar lehzual a kalpui dan tur an rel a, Kolasib khawpui huam chhunga Village Council tinah ni khat tal ‘Faina hnatlang’ neih an rel.

Hun kaihruaitu Dr.H.Lalthlangliana, Deputy Commissioner chuan Kolasib chu ‘Garbage Free City 1 star Rating’ ni tur a dilna thehluh tawh a nih thu sawiin thuneitute pawhin endikna an rawn kalpui thuai beisei a nih thu a sawi a. KTP khawmpui lian thleng tur kan nih bawk avangin mikhualte entawntlak tur khawp a faina kawng a hmalak a pawimawh thu a sawi bawk a ni.

Pu Timothy R.Lalhmangaiha, DUDO chuan ‘Garbage Free City’ ni tur a tehfung pawimawh hrang hrang sawi zauna hun hmangin Pu S.T.Lalhmingmawia, DLAO chuan hnatlang koh chungchanga Village Council dan dinglai inhrilhhriatna hun a hmang bawk a ni.

Vawiin thutkhawmnaah hian March 2022 ral hmaa Kolasib khawpui huam chhunga Village Council tinah ‘Faina Hnatlang’ koh rel a ni. ‘Garbage Free City’ ni turin chhungtinin mahni in leh a vel theuh fai tak a enkawl tur a nih thu te, kawng dung a bawlhhlawh then fai dan tur leh kawng a insakna bungrua leh hmanrua chhekkhawm awmte felfai zawk a dahsawn tur a hmalak dan turte rel a ni a. Kolasib khaw chhung a lui hnar humhalh leh tihfai dan tur sawiho ni bawkin khaw chhung hmun laili lai chei mawi dan turte sawi a ni.

Thutkhawmnaah hian Kolasib khaw chhunga Sawrkar department-a hotute, NGO leh Village Council hrang hranga hruaitute an tel a ni.