Mizoramin LP Gas a harsatna sutkian dan ngaihtuah turin Minister of State, Petroleum & Natural Gas Pu R.P.N. Singh hovin October thlatirah Aizawlah North East huamchhunga Civil Supplies Minister meeting neih a ni dawn.

Pu H. Rohluna, Minister, FCS&CA etc. chuan vawiin khan Pu R.P.N. Singh, Minister of State, Petroleum & Natural Gas chu a office chamber-ah hmuin Mizoramin petrol leh LP Gas-a harsatna kan neih mek te a thlen a. Pu R.P.N Singh chuan, Mizoramin gas chungchanga harsatna a tawh chu a lo hriat tawh thu leh kum 2001 census a a landanin Mizoramah number of household aia tam gas connection a awm a, chu chu siamthat a ngaih thu a lo sawi a. Hemi chungchang hi FCS&CA Minister Pu H. Rohluna chuan sawifiahin, Mizoram hi kan thenawm state Manipur atanga rawn pem lut an awm avang leh border country Myanmar atangin raltlan (refugee) leh dan loa lo lut an awm reng a. Chungte chuan kan ram chhunga gas semte an ei hek ve zel si a. Kum 10 meuh a lo liam leh tawh a, 2001 chhiarpui ai hian tunah phei chuan in leh mihring nasa takin a tam leh tawh zawk a, chuvang chuan LP gas hi a indaih theih loh thu a sawi a ni.

Minister H. Rohluna chuan Pu R.P.N. Singh chu Mizoramin harsatna a tawh mekte a hmuna enpuia harsatna sutkian dan kawng dappui tur leh hma laksak turin a sawm a, chumi tihhlawhtlinnan chuan North East huamchhunga Civil Supplies lama mawhphurtu Minister te chu October thla tir hian Aizawlah meeting neihpui a tum thu a sawi a ni. Chutiang taka Pu R.P.N. Singh-a’n hmalakpui a tum chu Pu H. Rohluna chuan lawmawm a tih thu a sawi bawk a ni.

FCS&CA Minister hi UD&PA Minister Pu Zodintluanga leh Parliamentary Secretary Pu K.S. Thanga ten an tawiawm a ni.