Prime Minister Dr. Manmohan Singh chuan, “Pu Lal Thanhawla tawnhriat ngah leh a ngaihna hria hruaitu Mizoramin a nei hi Mizoram mipuite ka lawmpui hle a ni”a ti. He thu hi vawiin 9.7.2012 a Pu Lal Thanhawla, Chief Minister, Mizoram in Prime Minister a hmuhna ah Dr. Singh hian a sawi a ni.

Mizoram Chief Minister Pu Lal Thanhawla chuan Mizoram tana Prime Minister in hmasawnna hnathawhna tur chi hrang hrang a tihsak avangin lawmthu a sawi a. Mizoram in duhsakna kawng tam taka a dawn avangin Mizoram pawhin hma a sawn ve zel thu a hrilh a ni. Pu Hawla chuan North East hi India ram hmun dang aia kalpawh a harsat avangin kawng tam takin North East hian hma a sawn chak thei lo a, tun tuma UPA Government ah pawh hian North East mi Cabinet Minister kan neih loh bakah mainstream India ke pen ruala North East miten ke an pen ve theihna turin North East mi ngei Pu Paban Singh Ghatowar, DoNER Minister chu Union Cabinet Minister-ah dah ve ngei a tul thu a thlen a. Chu bakah chuan District Council hun lai atang tawpa tun thlenga ram rawngbawlna a la inhmang experience nei tha Pu C.L. Ruala, MP (LS) pawh Union Minister zingah telh ve ngei ni thei se a duh thu a sawi a ni.

Pu Lal Thanhawla chuan Mizoram sum harsatna a tawh hrang hrang hrangte Prime Minister hnenah hian a thlen nghal a, PM pawhin lo enfiah sak ngei a tiam a ni. Tuikuk raltlante lak let lehna kawnga harsatna a tawhte leh hemi atana Mizoram in sum a mamawh belh thu a thlen bawk a. Chief Minister in Prime Minister a hmuhnaah hian New Land Use Policy (NLUP) hmalakna hrang hrang kalpui a nih dan report a pe bawk a, Mizoramin NLUP a kalpui danah Dr. Singh pawh a lawm hle a ni. Mizoram mamawh a thlen bakah hian Pu Lal Thanhawla chuan Prime Minister Dr. Singh chu Mizorama lo zina Sainik Building lungphum phum turin a sawm a, Prime Minister pawhin tihhlawhtlin ngei a tum thu a lo hrilh a ni.

Pu Lal Thanhawla hian Prime Minister a hmuh bakah Pi Sonia Gandhi, Chairperson, UPA  hmu bawkin Mizoram mamawh hrang hrang te a thlen a ni. Chief Minister hian naktuk lam hian Union Minister hrang hrang a hmu leh bawk ang.

Chief Minister hi Pu H. Rohluna, Minister, FCS&CA ; Pu Zodintluanga, Minister UD & PA etc. leh Pu K.S. Thanga, Parliamentary Secretary, Agriculture etc. ten an tawiawm a ni.