1803/2023-2024

LUNGLEI; the 7th September,2023: Gauhati High Court Judge a Lunglei Judicial District bialtu ( Portfolio Judge) Justice Nelson Sailo chuan vawiin khan Lunglei District Court a endik a, Court building thar sak theihna tur hmun te a en.Justice Nelson Sailo hian Deputy Commissioner leh Superintendent of Police te kawmna hun a nei bawk a. Dan leh thupek kenkawhna kawnga thawhhona tha zawk a awm theih nan leh mipui te zalenna leh dikna chanvo humhim a nih zel theihna atana thuneitute mawhphurhna te a sawipui. Hei bakah hian Bar hruaitute leh member te kawmin Court hmunhma tha zawk leh fuankim zawk neih anih theih nana hmalakna chak zawka kalpui nise an duhthu Bar hian an lo thlen a. Court case chak zawka tihfel anih theih nana tan la sauh sauh turin Judicial Officers te a fuih bawk.

Justice Nelson hian Court hmunhma siamthatna atana hnathawktu PWD building division hotute pawh kawmin, hmunhma tha rotling neih anih theihnan leh abikin Lunglei District Court hmunhma tawt lutuk tihziaawm thuai anih theih nan theih anga chaka hmalak dan tur a sawipui bawk. Lawngtlai District leh Siaha District a court leh quarters sakna a hmalak mek leh hmalak la ngai te uluk taka sawiho a ni.

Lunglei Judicial District-ah hian Lunglei District, Hnahthial district, Saiha district leh Lawngtlai District a awm a ni. Tun dinhmunah Lunglei District Court-ah hian case ngaihtuahlai mek 352 a awm.