1802/2023-2024

Vawiin chawhnu khan Commerce and Industries Minister Dr R Lalthangliana chuan thlai leh sa zawrhna tur Thenzawl Market Building thar a hawng.

Dr R Lalthangliana chuan mipui mimir tana tangkai, kut hnathawktuten an thil thar chhuah te an zawrh theihna tur bazar building tha tak hawn a ni ta chu lawmawm a ti a. Sawrkar chuan ei leh bara kan intodelhna turin hma a la a, he market building hawn thar tak pawh hi chumi kawnga tangkai tur, lo neitute tana sum lakluh theihna tur kawng hawng tu pakhat a nih theih ngei a beisei thu a sawi. Mizoramin tun hnaiah harsatna hrang hrang tawk a, COVID hripui a leng a, vawk hri avangin vawk sing nga chuang an pul tawh a, khua rel chhiatna te a thleng a, thenawm rama Zohnahthlak harsatna tawk te himna zawngin Mizoramah an rawn tlan a; hriat lawk loh harsatna hrang hrangin Mizoram a tlakbuak chung pawha hmasawnna hna thawh zawh tawh, thawh mek leh thawh tura ruahman engemawzat a awm hi a lawmawm tak meuh a ni, Dr R Lalthangliana chuan a ti.

Thenzawla sawrkar hmachhawp hrang hrang Commerce and Industries Minister chuan he hunah hian a sawi lang nghal a. Puantahna hmunpui, puan an tah thiam em avanga lar Thenzawl khua chu hmanraw hrang hranga thuam a ni dawn tih a sawi a. Khawvel zau zawk thlirin ram chhung chauh ni lo ram pawn thlenga kan thil zawrhin hralh a tlak theih nan kan thil siam chhuah reng reng quality tha, belhchian dawl a ni tur a ni, a ti.

Market Building thar hawn tak hi state sum cheng nuai 150 senga sak a ni a. February ni 22, 2021 khan sak tan a ni. A building hi chhawng hniha sak a ni a, a zau zawng hi 194.52 Sqm a ni. A chhawng hnuai zawk hi sa zawrhna tur a ni a. Vawksa , bawngsa, arsa leh sangha zawrhna tur a hranpain dawhkan siam vek a ni a, market office siam a ni bawk. A chhawng chung zawk hi chawhmeh zawrhna tura ruahman a ni thung a, mi 23 vel thu thei tura dawhkan siam a ni a, Godown a awm bawk a ni. Heng floor pahnihah hian mipa leh hmeichhe tan inthiarna hmun siam ve ve a ni bawk a ni.

Mizoram Handloom Export Facilitation Hub ah hian Guest House, Exhibition Hall cum Conference Hall, permanent stall 9, Design Development Centre, Common Facility Centre, restoration leh staff quarters te a awm ang. He project in a tum ber chu Mizorama puan tah leh design mawi tak tak te hmanga ram danga thawn chhuah tur siam chhuahna hmunpui tura ruahman a ni a. Textile Testing Laboratory leh Design Studio te, la dumna tur dyeing unit te bakah khawl chang kang tak tak warping machine, bobbin winding machine, fly shuttle frame loom leh a dang te dah tum a ni bawk. Mizorama puan tah te chu Indian Handloom Brand hnuaia in ziah luha, bar code te pek thlap tum a ni a. Tual chhung puan tah te chak zawka hralh a nih theih nan e-commerce platform hrang hrangah zawrh chhuah tum a ni bawk.

Market building thar leh Mizoram Handloom Export Facilitation Hub hawnna hun hi Commerce and Industries Additional Secretary Pu K Lalhmingliana’n a kaihruai a. Addl. Director Pi Lalsangpuii’n lawmthu sawina hun a hmang a ni.

Commerce & Industries Director Pi Florence Zotluangpuii chuan market building sak a nih dan technical report a pe a. Hei bakah hian Thenzawl hmuna an department hmalakna hrang hrang leh hmachhawp te a tarlang nghal a. Mizoram Handloom Export Facilitation Hub chhunga mamawh hmanraw hrang hrang leina tur leh cheina tur sum cheng nuai zariat sawmthum paruk dil mek a nih thu a sawi a ni.

Minister hi Commerce and Industries officer te, Health Department Officer te leh thawktu dang ten an tawiawm a ni.