1801/2023-2024

2023 Mimkut thla ni 8: Kolasib District AIDS Prevention and Control Committee (DAPCC) leh Mizoram State AIDS Control Society (MSACS) te ṭang kawp huaihawtin vawiin khan I&PR Conference Hall, Kolasib-ah District Level Red Ribbon School Quiz Competition buatsaih a ni a. Kolasib Bawrhsap Pu John LT Sanga'n Khuallian niin hun a hmanpui a ni.

Khuallian Pu John LT Sanga chuan zirlaite a ngaih pawimawhzia sawiin, sawrkar hna thawk leh tuna mi hlawhtling tak takte pawhin zirlai an lo nih ṭhin tawh angin, an pal tlang tawh ang dinhmuna ding mek zirlaite ngai pawimawh se a duh thu a sawi a. Zirlaite chu ram hruaitu tur leh ram hma hun tur an nih thu hrilhin, ram rochung a, kaihruaitu tur leh ram siam ṭha tur nihna thinlung pu-a lehkha an zir chuan Pathian malsawmna an dawng dawn a ni, tih hre turin a chah a. Zirlai nih chhunga tih tur pawimawh ber chu lehkha zir a nih thu sawiin, zirlaite chu an nih tumah chiang a, an tum tipuitling tura tihtak zetna nena lehkha zir tur te, hriselna ngai pawimawh a, zan mut hma leh zing thawh hma chin ṭhana nei tur te, ruihtheihthil laka inthiar fihlim a, mahni inthunun tlat tur tein a chah a ni.

Pu John LT Sanga chuan HIV/AIDS hluar zel chu ṭhalai tam tak tichhetu leh ram hmelma lian tak a nih avangin a dona kawngah mi tin ṭan rual a ṭul tak zet tih a sawi a. HIV/AIDS laka invenna ṭha ber chu nun thlahdah loh a ni tiin, ṭhalai kal khawmte chu an nun uluk turin a chah a. District Level Red Ribbon Quiz Competition chu hawngin, Quiz-a telte chu duhsakna a hlan nghal bawk.

He hun hi Kolasib District Education Officer Pi K. Lalsiamliani chuan a kaihruai a. Kolasib District Sr Chief Medical Officer Dr RK Lalthlamuana'n Kolasib District chhunga HIV/AIDS dinhmun leh a dona kawnga hma lakna report pein, kum 2002 June thla leh kum 2023 July thla inkar chhungin Kolasib District-ah HIV/AIDS an kai leh kai loh hriat nana thisen endik 90,559 (mipa 36,494 leh hmeichhia 54,065) aṭangin HIV+ve mi 1,787 hmuh chhuah an nih tawh thu a tar lang.

Hawnna hun hman zawh hian Quiz Competition ṭan nghal niin, Kolasib District chhunga zirna in 10 te an inel a. Sikul ai awh hian zirlai pahnih ṭheuh (Class-VIII, Class-IX & Class-XI zirlaite) an chhuak a ni.

District Level Red Ribbon School Quiz Competition 2023-ah hian R. Lalhriatzela leh Robert Hmangaihzuala, Kawnpui Higher Secondary School te chu pakhatna an ni a. Pahnihna chu C. Zoṭhapuii leh Jacob Lalhmingsanga, Govt High School Kawnpui te niin, HD Darthangmawii leh Lalruatsangi, Chawnghmingliani Memorial High School te chu pathumna an ni thung. Pakhatna hian lawmman ₹ 5,000/- leh certificate leh trophy dawngin, State Level Red Ribbon School Quiz Competition-ah Kolasib District ai an awh dawn a. Pahnihnain ₹ 4,000/- leh certificate leh trophy dawngin, pathumnain ₹ 3,000/- leh certificate leh trophy an dawng a. Bernadette Vanlalmuankimi leh Jessica Lalchhandami, Kolasib High School te chuan Consolation Prize ₹ 2,000/- leh certificate an dawng bawk.

Red Ribbon School Quiz Competition hi school level-ah buatsaih hmasak niin, Kolasib District bikah school level-ah hian District chhunga sikul 41 te an inel a. Chumi aṭanga a ti ṭha zual sikul 10 te chu District level-ah hian inel lehin, District level-a pakhatna hian State level-ah Kolasib District ai an awh dawn a. Regional level leh National level thlengin quiz competition hi buatsaih a ni ang.