No.4038/2020-2021

Mamit 12th August, 2020 : Vawiin khan Hon'ble Justice Michael Zothankhuma, Judge, Gauhati High Court - Cum - Executive Chairman, Mizoram State Legal Services Authority (SLSA) chuan Mamit District Jail a tlawh hnuin I&PR Conference Hall, Mamit-ah Mamit District chhunga Para Legal Volunteers (PLV)-te tan intuaitharna Workshop a neihpui.

Pu Michael Zothankhuma chuan PLV te'n kan hnathawh leh tihtur ber chu dan hnuaia midangte tanpui a ni a ti a. Mi harsa leh thil hrelo zawkte'n Court sang zawk thleng kher lova an awm hmuna an harsatna chinfelpui niin, thingtlang lama awmte'n Sawrkar Department hrang hrangte hmalakna leh tanpuina awm thei tur hrilhhriat kawnga midangte tanpui a nih tel thu a sawi. Midangte tanpuina kawnga mahni inpe-a thawhhlawk tak an nih avangin an mamawh leh an harsatnate ngaihthlaksak ngei a duh avangin Mamit District PLV- te nena Workshop buatsaih a nih thu a sawi bawk.

Pu R. Vanlalena, MJS, Member Secretary, Mizoram SLSA pawhin thusawiin Mamit District chhunga PLV-te chu Gauhati High Court Judge leh Mizoram-a Court lama kan hotu lu ber nena an harsatna, an hmachhawp leh an hlawhtlinna sawihona hun an nei thei chu an vanneih takzet thu a sawi a. PLV- te chu midangte tanpuina kawnga phur zawka hna thawk zel tura chahin, harsatna an neihte leh an hlawhtlinna bakah an hna hmachhawp atana hriat belh duh an neihte sawichhuak hrehlo turin a chah bawk a ni.

Mamit District chhunga PLV hrang hrangte tan harsatna leh hriat duh an neihte sawichhuahna hun hawn niin an zawhnate hi Pu Michael Zothankhuma leh mithiam dangte'n an chhang nghal a ni.

He hun hi Pu Joel Joseph Denga, MJS District & Session Judge, Aizawl- cum- Chairman, DLSAs, Aizawl Judicial District chuan a kaihruai a, Pi Mimi H. Rosiamliani, Co-ordinator, Mizoram SLSA chuan PLV-te'n an hnathawh an report-na tura form hman tur zirtirna a nei a. Pu Laldinpuia Tlau, MJS CJM Mamit/ Secretary, Mamit DLSA in lawmthu sawina a nei bawk.

Tukin khan Pu Michael Zothankhuma, Judge, Gauhati High Court - cum- Executive Chairman Mizoram SLSA chuan Mamit District Jail a tlawh a. Jail tang mekte dinhmun leh harsatna an neihte ngaihthlaksakin Jail Building leh hmunhmate a enfiah nghal bawk a. Dr Lalrozama, IAS, Mamit District Bawrhsap leh CJM, Mamit bakah State Legal Services Authority hotute'n an tawiawm a ni.