No.4039/2020-2021

Aizawl, the 12th August 2020: Vawiin khan Mizoram Remote Sensing Application Centre (MIRSAC) chuan Directorate of Science & Technology Conference Hall, Mizoram New Capital Complex, Khatla ah Dr. Vikram A. Sarabai 'Father of Indian Space Programme' pianchamphaphak denchhenin National Remote Sensing Day an hmang a. MIRSAC in Mizo tawng a an lehkhabu buatsaih Remote Sensing & GIS chu he hunah hian, Dr. R.K.Lallianthanga, Chief Scientific Officer & Member Secretary, MIRSAC, Dte. of Science & Technology chuan a tlangzarh a ni.

Dr. R.K.Lallianthanga chuan India ramin Vansang lam thiamna kawnga tun dinhmun a thlen theihna chhan chu Dr. Vikram A. Sarabai hmalakna rah a nih thu sawiin India ram chu khawvel huap pawhin vansang thiamna lamah hmun pawimawh taka a din tawh thu a sawi a. Mizoramah pawhin hetiang lama thiamna a hman tangkai theih turin MIRSAC kaltlangin theih tawp chhuahin hma a la mek a ni a ti a. MIRSAC hi North East India State Remote Sensing Centre zingah thawk tha ber pawl a nih thu thu sawiin, MIRSAC Scientist-te leh thawktu dangte chu ram leh hnam tana thahnem ngai taka thawk sauh sauh turin a fuih a ni.

He lawmna inkhawm hi Pi Hmingthanpuii, Principal Scientist, MIRSAC chuan a kaihruai a. National Remote Sensing Day hi ISRO Centre hrang hrangin kumtin August 12 a lawm thin anih thu a sawi. He lehkhabu tlangzarh tak hi Ram hruaitu pawimawh te, Department hrang hrang leh research scholar ten Remote Sensing leh GIS an lo hriatchian lehzual theihna tura ziak a nih thu a sawi bawk ani.

He lehkhabu hi a hmang tangkai turte hnenah sem a ni ang a chumi bakah chuan MIRSAC website www.mirsac.mizoram.gov.in ah a duh apiang tan a lak chhawn theih turin dah a ni bawk ang.