944/2022-2023
Champhai, the 17th June, 2022: Gauhati High Court Judge Justice Marli Vankung, Champhai Judicial District Portfolio Judge ni bawk chuan vawiin khan District Court Champhai tlawhin a endik a. Hemi hnu hian District Court ram Champhai Vengsang leh Dinthar veng amite a tlawh bawk.

Justice Marli Vankung chuan Judiciary, Executive leh Force-te inkarah thawhhona tha a awm a tul thu sawiin, heng zinga pakhat pawh a chak loh chuan a pumin a chaklo dawn a, inpawhtlang takin harsatna awmte sawiho a chinfel dan ngaihtuahho thin a tul a ni, a ti a. Champhai Judicial District-ah pawikhawihna thleng a tam avang leh pawikhawihna lian tham tak tak a awm nual avangin chak zawka hmalaka chinfel a ngaih thu a sawi a. Jail dinhmun leh a chhunga awmte hriselna leh an dinhmunte ngaihven a tul thu a sawi bawk.

Justice Marli Vankung hian vawiin khan District Court Champhai hmunhma leh hnathawh dante a enfiah a. Juvenile Justice Board Champhai leh District Legal Services Authority report te, hnathawktu neih dan te, inbiakpawhna leh hmasawnna ruhrel siamte a endik a. Case neih dante leh chinfel a nih dante, chak zawka case chinfel a nih theih nana hmalak tulte Judicial Officer-te a sawipui a ni.

Hemi hnu hian Champhai Vengsang Mualbawk ram leh Dinthar venga Court ramte tlawhin District Court Complex siam dan turte a enfiah bawk a ni.

Justice Marli Vankung hian nizan khan Champhai a lo thleng a. High Court Judge hi District hotute atangin District Bawrhsap Pu James Lalrinchhana, SP Pu Lalrinpuia Varte, District Court atangin District & Sessions Judge Pu Liansangzuala, Addl. District & Sessions Judge Pi Sylvie Zomuanpuii Ralte te bakah Pu Lalnunfela Chawngthu, SDO Sadar, Pi R. Lalnunkimi, Jail Superintendent leh Official dangten an lo dawngsawng a, Circuit House Conference Hall-ah inkawmhona hun an hmang a ni.

Justice Marli Vankung hi Aizawl atangin Pi Gracy L. Bawitlung, Joint Registrar (Judicial), Pi Melody Lalrochampuii, Joint Secretary, Law and Judicial Department leh Pu Kaizamang Thangeo, Court Officer ten an tawiawm a ni.