945/2022-2023
Lunglei the 17th, June' 2022 : South Tuipui bialtu MLA leh Higher & Technical Education Minister ni bawk Dr.R.Lalthangliana bultumin MZP Sub-Hqrs Cherhlun chuan vawiin khan an huamchhung a khaw 5 - Thingsai, Bualpui H, Cherhlun, Ngharchhip leh New Ngharchhip atanga HSLC leh HSSLC first division a pass tharte chawimawina hun Cherhlun Community Hall-ah buatsaihin Hnahthial District Bawrhsap Pu R.Lalremsanga chuan Khuallian niin a hmanpui a ni.

Pass tharte chawimawina hun hi Pu Biakhlupuia, Vice President, MZP Sub-Hqrs Cherhlun chuan kaihruaiin Pu R. Lalremsanga chuan HSLC leh HSSLC a pass ringawt hi hlawhtlinna ala nih loh thu sawiin kawng zawh tur thui tak ala awm a, tih tak takna nen in kal chhoh zel a ngai a, harsatna tam tak pawh inla hmachhawn theih avangin pehhel mai lova tawrhchelna nen in paltlang ngam a ngai a ni tiin zirlaite a fuih a, nun uluk turin a chah bawk. Taimakna tel lovin a hlawhtlin theih loh tih pawh sawiin mi zawng zawng tan sorkar hna hi a inhawng kher lova, engkawngah pawh kan thlen chinah zel theihtawp kan chhuah a ngai a, zirlaite phei chuan Smart phone leh games te thlauhthlak ngam a ngaih chang a awm tih kan hriat reng a tul a ni a ti. Zirtirtirtu thenkhatin aikal la a, midang chhawr an ching thin chu thil thalo tak a nih thu sawiin zirtirtute hian an zirlaiteah thiamna leh hriatna an pek chhuah tam poh leh an income a sang zawk a ni tiin zirtirtu chuan a zirlaite a ngaipawimawh hmasa ber tur tih a sawi a, zirtirtu tha chuan zirlai tha an chherchhuak a, zirtir hna hi a pawimawh in kan ram innghahna a ni a ti bawk.

Pu R.Lalremsanga chuan Covid-19 avangin kum hnih vel zirna kalpui that theih a nih loh hnuin kuminah kal chhoh pui tan a nih leh chu lawmawm a tih thu sawiin Zirlaite mai bakah nu leh pa te pawhin tan kan lak a ngai a, zirtirtute kutah kan fate dah ringawt lovin, kan rohlu an nih ang ngeiin an dinhmun dik tak hrechiang turin kan hun leh tha seng ila, chhungkua atangin zirna hi i ngai pawimawh ang u a ti bawk

Vawk natna ASF hrilengin Cherhlun a tuam mek leh Vawk tam takin an thih pui tawh chu pawi a tih thu leh Vawk vulhtute a tawrhpui thu Pu R.Lalremsanga chuan sawiin khapna thupek chhuah te chu tha taka zawm turin a chah a ni.

He hunah hian Pu Jacob Lalmuanpuia, Gen.Secretary, MZP Gen.Hqrs leh Pu C.Runremsanga, President, MZP Sub-Hqrs Cherhlun bakah khawtlang hruaitu pawimawh tak tak ten zirlai pass tharte lawmpuina leh fuihna thu an sawi bawk a ni. Zirlai chawimawina hlante hi first division a pass chin niin HSLC pass thar 29 leh HSSLC Pass thar 15 an vaiin mi 44 an ni a, 100% pass zirna in 4 - Cherhlun Higher secondary School, Gov't High school Cherhlun, Runzawl High School Cherhlun leh Thingsai Higher Secondary School te hnenah chawimawina thuziak hlan an ni.

Vawiin vek khan Pu R. Lalremsanga hian Cherhlun a Vawk farm siamtu leh MYC Young Achiever's Award lo dawng tawhtu Pu H.Lalengmawia chu a Vawk vulh lai 99 zet an thih avangin an chenna inah tlawhin a tawrhpui thu hrilhin hmalam hun a eng zawnga thlir thiam turin a fuih a, tanpuina kawngah tih theih a neih chuan a inhawn reng thu a hrilh bawk a ni. Hei bakah hian Cherhlun Damdawi In (PHC) pawh a tlawh nghal bawk a ni