2188/2026-2027 

Kolasib, 11th September, 2026: Vawiin khan Gauhati High Court Judge leh Executive Chairman, Mizoram State Legal Services Authority (MSLSA) ni bawk, Hon'ble Mr Justice Nelson Sailo chuan Kolasib  tlawhin, pawikhawihna tuartute zangnadawmna semna hun a hmanpui bakah Kolasib District Jail leh Court building sak mekte a enfiah.

UD&PA  Conference Hall, Diakkawn-ah 'Sensitization Programme on Victims of Crime Compensation Scheme, 2011' hi hman a ni a. He hun ah hian Kolasib District chhunga zangnadawmna dawng thei mi 29 hnenah zangnadawmna cheng 1,28,50,000 (Cheng vaibelchhe khat, nuai sawmhnihpariat leh sing nga) sem chhuah nghal a ni.

He hunah hian Justice Nelson Sailo chuan thu sawiin, zangnadawmna dawngtute chu an chhungkaw mi leh an hmangaihten  vanduaina an tawh avanga he zangnadawmna hi dawng an ni a, a ti a. Eng ang zat pawh sum dawng mah sela an rilru nate a thawi dam  dawn lo a, amaherawhchu an sum dawn chu eng emaw kawng tala naupangten tha taka an seilen na tur atana tanpuina a nih a beisei a ni, a ti. Pawisa an dawn chhan hrechiang a, tangkai taka hmang turin dawngtute a chah a. He compensation piahlamah pawh Kawng engkimah fimkhur a, hnam anga tan lak a ngaih thu sawiin, dan kenkawhna kawngah Police leh Court lam pawhin theih tawp an chhuah reng a, tanpui ngai te tan legal service a thawkte an inpeih reng thu a sawi bawk.

Kolasib Bawrhsap Pu H. Dolianbuaia pawhin thu sawiin, sorkarin vanduaina  tawkte tanpuina tur a duan chu duhzawng leina leh chhungkaw mamawh phuhrukna ringawt atana hmang lova, naupang enkawlna kawnga tangkai taka chhawr turin dawngtute a chah.

Inlawmna thuchah sawitu Pu V. Vanlalhriata, Chief Judicial Magistrate & Secretary, DLSA pawhin zangnadawmna hi nakina naupang enkawlna, school leh college zirna bakah an nupui pasal neih thlenga inchhawmdawlna tura buatsaih a nih thu a sawi a bawk.

He Mizoram Victims of Crime Compensation Scheme 2011 hi semchhuah anih  atanga tun thleng hian MSLSA atangin Cheng 16, 68, 52, 000/.(Vaibelchhe sawmparuk nuaih sawmruk parlat singnga sang hnih chiah) pek chhuah tawh ani a. Hei hian kum 2025 lalhawl thlenga Award a huam a, chumi hnua Award siam atanga sum pek chhuah ngai Cheng 51, 25, 000/-(nuaih sawmnga pakhat sing hnih sang nga chilah) hi State sorkarah dil leh tur a awm mek ani. Thla tin DLSA ten Award an siam thar te dawn belh pah reng ani a, tin, DLSA ten compensation dilna an dawng thar belh reng bawk a ni.

He hun hi Pu R. Vanlalena, Judge, Fast Track Court-cum-Additional District & Sessions Judge, Kolasib chuan lawmthu sawiin a titawp a ni.

Zangnadawmna sem chhuahna hun hman hma hian  Justice Nelson Sailo hian Kolasib District Prison and Correction Home a tlawh a. Pu Lalbiakdika, Superintendent, District Jail kaihhruai he hunah hian tangte hnenah thu sawiin, anmahni a ngaihpawimawh avanga rawn tlawh a nih thu a sawi. "In awmna hi in awm hlenna tur a ni lo a. In awm chhung hi hun hmang tangkaiin, chhungkua leh vantlang tana mi tangkai ni tura inngaihtuah nan hmang rawh u," tiin a fuih.

Jail a tlawh chhan pakhat chu a building leh  an mamawh dang te a hmuna endik tum  a nih thu a sawi  a. Sorkarin tangte tan Mulaqat, legal aid help desk leh chanvo hrang hrang a siamsakte chu tangkai taka hmang tur leh, an chhuah hnuah pawh khawtlang tana mi tangkai ni turin a chah bawk.

Tlai lamah Justice Nelson Sailo hian Kolasib Project Veng-a Fast Track Court Building sak mek a hmunah a enfiah nghal bawk a ni.

Vawiina High Court Judge hun hmanna hi  Pu Vincent Lalrokima, Member Secretary, Mizoram State Legal Services Authority; Kolasib District-a Judicial Officer te; District Legal Service a thawktute; Kolasib DC leh Senior SP ten an tawiawm a ni.