PHE Department bultum leh I & PR Department huaihawtin tualchhung chanchinbumi engemaw zatte chu vawiin khan Greater Aizawl Water Supply Scheme Phase I & II hmunpui Tlawng leh Dihmunzawl fanpui an ni a, Aizawl khawpui tuiin tur thianghlim pek dan leh khawl hrang hrang mamawh bunte chipchiar taka kawhhmuha hrilhfiah an ni.

PHE E-in-C Pu R. Lalfanliana leh a thawhpui Engineer ten chanchinbumite hi lo dawngsawngin an thil hriat duhte an hrilhfiah. GAWSS Phase I hi kum 1988 a hnathawh tir tan a ni a, Aizawl khawpuia cheng mihring 80,000 chawm thei tura duan a niin, vawiin ni thleng hian hnathawk theia la enkawl chhunzawm hram hram a ni. GAWSS Phase II hi Aizawl mipui nuai thum leh sing khat chawm thei tura duan, diesel khawl hmangin May, 2007 khan hnathawh tir tan a ni a. Electric hmangin Pump Set 1 kum 2009 ah leh Set dang kum 2010 khan hnathawh tan tir leh a ni ta bawk.

PHE Engineer hote chuan Aizawl khawpui thli atanga mi ni ngei tura rin theih Polythene engemaw zat chu tunhnai hian tui pump na hmunah an hmuh thin thu an sawia, hei hi kum danga an la hmuh ngai loh thil anih thu leh khawpuia chengte bawlhhlawh paih fimkhur loh avanga thil awm thei nia an rin thu te chanchinbumite chu hrilhin hei hian tui pump khawlah harsatna hrang hrang a thlen theih avangin mipui mimir pawh bawlhhlawh paih kawngah fimkhur theise an duh thu an hrilh a ni.