Vawiin chawhnu dar 1.30 khan School Edcuation Conference Hall-ah Education chungchanga Consultative Committee chuan meeting an nei a. He meeting hi Education Minister Pu Lalsawta’n a kaihruai a; Pu Chawngtinthanga, Parliamentary Secretary te, K. Liantlinga, MLA te, Pu John Siamkunga MLA te, Pu Joseph Lalhlimpuia MLA te bakah Education Secretary Pu K. Lalnghinglova te, Rev. Dr. Lalchungnunga, MBSE Chairman te, SCERT, School Education, Higher & Technical Education Diretor-te leh Mizoram University aiawhte an tel a ni.

Pu Lalsawta chuan, “Consultative Committee hi inrawnkhawmna satliah a ni mai lova; kan kalphung leh policy-te hi inhriatpui a, a siamthat ngai lai apiangah in bengvar chhuah hi kan duh ber a ni” a ti. He meeting-ah hian National Curriculum Framework (NCF) dungzuia syllabus ennawn chungchang te, polytechnic thar tur 6 ruahman mek enkawl dan tur te, zirna sang zawk than zelna kawnga private institution-te hmalaknate leh enkawl dan turte chipchiar taka sawiho a ni.