General Election lo awm tur atana lo inhmakhaw suih lawk nan nimin tlai dar 3:00 khan Champhai D.C Pu Lalthangpuia Sailo, IAS kaihhruaina in D.C Conference Hall-ah Sawrkar Department hrang hrang a Head of office ten meeting an nei.
Kan hma lawka inthlan lo awm turah inthlanna in a kaihhnawih tur hmalakna pawimawh hmasa te ngaihtuah ho a ni. Chutah chuan venghimtu sipai engemaw zat dah belh an nih dawn avangin an thlenna tur leh a kaihhnawih dang - inthiarna, tui, ei leh in leh thil dangte ngaihtuah ho nghal a ni a, Saikhumphai bikah chuan Electric current a la awm loh avangin emergency a tan eng/power pek dan tur ngaihtuah a ni a, power line pangngai hmanga hmanhmawh taka eng pek theih a nih loh chuan generator emaw thil dang hmanga eng pek dan ngaihtuah nise tih a ni bawk.
Meeting kaihruaitu D.C chuan inthlanna lo awm turah hian officer leh an staff zawng zawngte chu a tul anga thawk thei tura inpeih reng tura a ngen bakah hna pawimawh bika duty turte phei chu chhuanlam siam lo turin a ngen nghal bawk a ni.
